Jăt sră yal bơh klau pơgru Lê Văn Lâm dê, bơto tàm Hìu bơsram Kâp bàr thị trấn Đăk Hà, kơnhoàl Đăk Hà, càr Kon Tum dê yal, ngai 05/10 pa do, dùl mpồl cau lơh pơrlồm là kwang bàng lùp khàu Kwang àng càr Kon Tum mờ Ƀộ Kwang àng hòi bơh điện thoại yal bè broă klau pơgru geh gơrềng tus dùl dơ̆ tăc bro ma túy dờng. Nàng ờ gơrềng tus cau tàm hìu bơnhă kung bè geh bơta dong kờl lơh tơn jơh bơta wàn, bơh bơta bơto pơlam mờ rồn bơklơn bơh mpồl cau pơrlồm do dê, klau pơgru Lâm neh lèng càn 1 tơmàn 100 tơlak đong pơyua tàm tài khoản tàm dùl ngân hàng tơnơ̆ hơ̆ gơtìp cau pơrlồm sa jơh tơn priă do. Klau pơgru Nguyễn Văn Hiền, Kwang ătbồ Hìu bơsram Kâp bàr thị trấn Đăk Hà là tiah klau pơgru Lê Văn Lâm gam lơh broă, pà gĭt: Tŭ mờ klau pơgru Lâm yal den añ là Kwang ătbồ Hìu bơsram dê pơndờm pơnđiang tơn klau pơgru Lâm mờ sồr lòt yal mờ Kwang àng kơnhoàl in. Bè đah añ là añ yal mờ Đảng ủy, Ủy ƀan. Drim ngai do là klau pơgru Lâm lòt tus anih Kwang àng càr.

Bal mờ klau pơgru Lê Văn Lâm, tàm thị trấn Đăk Hà, kơnhoàl Đăk Hà, ùr pơgru Hồ Thị Thu Sương, bơto tàm Hìu bơsram Kâp pe Trần Quốc Tuấn kung pa gơtìp cau pơrlồm bơh tàm internet gơguh tus 270 tơlak đong.

Sră yal bơh ùr pơgru Sương dê pà gŏ, ngai 09/10 pa do, ùr pơgru Sương cih mat tus bal broă lơh săc rwah ai cau đơs crih in. Jăt jơnau sồr bơh broă lơh dê, priă pal jàu ai tơl kơnòl broă in gơguh rơhời tus 100 tơlak đong. Mờ bơcrì ngan rlau jơh là sồr ùr pơgru pal jàu 220 tơlak đong den hơ̆ sồng geh ai wơl geh priă 100 tơlak đong neh jàu lài hơ̆. Tàm jơnau hìu bơnhă kal ke, mờ gam geh tai jơnau muăt jrùm, ùr pơgru Hồ Thị Thu Sương neh lèng càn 170 tơlak đong jàu ai broă lơh in den hơ̆ sồng gĭt geh là he neh gơtìp cau pơrlồm.

Broă ală pơgru tàm kơnhoàl Đăk Hà, càr Kon Tum gơtìp cau pơrlồm ờ mìng hoàc hươr bè lơh sa bơh să tờm dê mờ gam lơh anih là tiah pơgru lơh broă geh tai broă, geh tai kơnòl. Klau pơgru Mai Xuân Kiên, Kwang ătbồ Hìu bơsram Kâp pe Trần Quốc Tuấn, pà gĭt: Tơnơ̆ tŭ ùr pơgru gơtìp bè hơ̆ den hìu bơsram gĭt geh jơnau yal, sồr tơn đah Kông đoàn hìu bơsram dong kờl pơndờm pơnđiang ƀà ùr pơgru geh bal trồ mang hơ̆ sùm ơm rềp bal pơndờm pơnđiang nùs nhơm ùr pơgru in pleh gơlik geh ală jơnau digơlan gơlam tus ală broă lơh ờ di. Bơto pơlam ai ùr pơgru in tàm broă lòt lùp lòt yal mờ ală anih lơh broă geh gơnoar mờ hìu bơsram kung gam pơn jăt tai pơndờm pơnđiang kung bè ơm rềp bal, jăt sền ùr pơgru nàng ùr pơgru iang nùs.

Bè jơnau bơh tài gơlik tus broă uă pơgru tàm ù tiah kơnhoàl gơtìp cau pơrlồm tàm internet, mò Lê Thị Nhung, Kwang ătbồ Cơldŭ Bơto bơtê kơnhoàl Đăk Hà, càr Kon Tum đơs là, geh uă ngan jơnau: Bulah neh geh bơto tơngkah lài rao bơh anih lơh broă geh gơnoar, kwơmàng là bơh kwang àng dê. Bulah bè hơ̆ kung gam geh sơl jơnau pơgru pin dòn tàm ală jơnau pơrlồm pơn jồ, hoài jà. Digơlan pơgru ờ hềt gĭt geh cau hơ̆ kờñ tàm bơta lơi? Dơ̆ bàr digơlan pơgru gam kờñ dùl bơnah priă lơi hơ̆ nàng ngui sa ai să tờm halà hìu bơnhă in den tàng lơh bal broă hơ̆. Dơ̆ pe tàm jơnau pơrlồm pơgru tồn lah he gơtìp gơ ơm tàm jơnau gơlik geh lơi hơ̆ ngan den tàng là neh lơh jăt jơnau bơto pơlam hơ̆ nàng hơ̆ sồng lồi dŭt là pơyua priă.