Tàm pơrjum, Củ tịc Quôk hội Vương Đình Huệ đơs nền broă lơh jat sền bơh Quôk hội, Ủy ƀan Thường vụ Quôk hội dê geh lam lơh jat tơm làm, ring bal, gàr niam tŭ tơngai hơ pơrgon mờ lơh gơs jơh ală tơngume jat broă rơndap lơh; mờ kung ngai sơlơ ai tơnggŏ bơta ngac ngar tềng đap ală broă dờng, geh sền gròi uă tàm rài kis lơh sa- mpồl bơtiàn bơh dà lơgar dê geh cau tĕ khà, làng bol, ală kwang bàng Quôk hội sền gròi. 

Đơs tai, broă lơh lùp mờ hơ jơnau lùp tàm ală dơ̆ pơrjum Quôk hội dê neh di jat jơnau sồr, di mờ bơta geh ngan bal mờ uă tam gơl pa, di tŭ bơsong ală broă cau tĕ khà mờ làng bol sền gròi. Bơh broă lùp mờ hơ jơnau lùp ai gŏ, broă sac rơ wah, lơh nền tơngume lùp mờ hơ jơnau lùp neh jat bơta geh ngan, di ală broă geh sền gròi uă, ală broă ờ suk tàm rài kis lơh sa- mpồl bơtiàn, ndrờm là ală tơngume ờ mìng cèng broă gơlik geh pah ngai jal mhar, mờ gam cèng bơta kuơmàng, jŏ jòng, lơh jat bơta kơp kờñ bơh cau tĕ khà mờ làng bol gùt lơgar dê.