Tàm dơ̆ lơh broă, Đại sứ ồng Đặng Hoàng Giang ai tơnggŏ bơta ki ngàm git gơp lơh bơyô bal ờs mờng niam bơnĕ mờ ngai sơlơ geh lơh kơ̆ kơljap đah 2 lơgar tàm rlau 50 nam do, kuơmàng là ai lơh ngoh rơngac ngan tềng đap bơta dong kờl kuơmàng bơh lơgar Ghana dê tàm tơngai tam lơh ai wơl lơngăp lơngai is bơh Việt Nam dê. Bơh bơta git gơp niam bơnĕ, 2 gah ring bal đơs là, Việt Nam mờ Ghana geh uă bơta pràn dờng nàng rề ơnàng rlau tai bơta git gơp lơh broă bal 2 gah tàm uă broă, geh bơh broă tàm pơ gơl ală dơ̆ lòt còp lơh broă tàm ală kâp, rề ơnàng kă bro, bơcri priă mờ lơh broă bal tàm ală gah geh bơta pràn, tàm hơ̆ geh năng lượng lơh geh wơl, năng lượng sàng goh.