Tàm dơ̆ lòt còp ngan ngồn tus lơgar Malaysia, mho ngai 21/11, Tổng Ƀí thư ồng Tô Lâm mờ Thủ tướng lơgar Malaysia ồng Anwar Ibrahim đơng lam bal dơ̆ pơrjum ƀăo yal cồng nha dơ̆ pơrjum bơyai. Tàm dơ̆ pơrjum ƀăo, Tổng Ƀí thư ồng Tô Lâm mờ Thủ tướng lơgar Malaysia pà gĭt, 2 lơgar neh lơh nền tơngguh broă gĭt gơ̆p Việt Nam mờ Malaysia gơguh tus Tam klăc lơh broă bal Jŏ jòng tơl làm. Bơh hơ̆, rơ̆p dong 2 lơgar pơn jăt tai lơh kơ̆ kơl jăp mờ tơngguh tai lơh broă bal lơh bơyô bal, pin dờn cíñ trị đah 2 lơgar jăt tàm bơta ki ngàm adăt boh lam ală lơgar, lơngăp lơngai is, gơnoar tờm ù tiah dà lơgar, tơl làm ù tiah dà lơgar mờ ală adăt boh lam cíñ trị, dipal mờ broă lơh sa- mpồl bơtiàn mờ kơrnoăt boh lam, jơnau sồr bơh tơl lơgar dê mờ bơta pal jăt bañ ƀư tàm broă lơh dơlam is bơh gơ̆p dê.

Broă tờm bơh tơnggume tàm Tam klăc lơh broă bal Jŏ jòng tơl làm geh sơlơ pin dờn tai mờ lơh broă bal cíñ trị, sền gàr dà lơgar, lơngăp lơngai, lơh geh bơnàng jă gĭt gơ̆p kơ̆ kơnhăp, pơgồp bơnah gàr niam tiah ơm kis ring lơngai, kơ̆ kơl jăp ai bơtàu tơngguh in bơh sơlơ tàm pơgơl mpồl kwang bàng lòt còp bal mờ gơ̆p, lơh broă bal tàm jơh ală kâp, ală gah; lam lơh geh cồng nha ală broă lơh tìp măt tơm bơh bơr, lơh broă bal neh geh lài, mơkung kơlôi sơnơng tơnggơs ală mpồl lơh broă pa dipal mờ jơnau kờñ, bơta kwơ bal bơh 2 gah dê tàm bơta pa.