Lòt gan 30 nam crơng gơs mờ bơtàu tơnguh, bơh mìng 4 nă cau sơn rờp, tŭ do neh kơ̆ kơljap tàm khà 60 nă cau, gơ wèt 8 jơi bơtiàn, là anih lơh broă sùm dờng ngan rlau jơh bơh Anih jơnau đơs Việt Nam dê. Kờp bal pah nam, Anih lơh broă sùm Anih jơnau đơs Việt Nam tàm tiah Tây Nguyên lơh gơs rlau 2 rbô jơnau sră ƀău. Ală jơnau đơs pờ tơlik mờ 6 dà kòn cau geh: Rơđê, Jarai, Bahnar, Sơdàng, K’Ho mờ M’Nông geh uă bơta tam gơl pa, bơceh lơh, lơh gơlik bơta rềp mềr mờ làng bol, mờ kờp jơh tŭ jơ pờ tơlik pah ngai là 17 jơ 30 phuk (bơh 5 jơ drim tus 10 jơ 30 phuk mang).

Đơs tàm pơrjum, Kwang geh jơng tàm Đảng dà lơgar, Kwang atbồ dờng Anih lơh broă jơnau đơs Việt Nam ồng Đỗ Tiến Sỹ đơs nền, tơngai tus rơp pơgồp bal jơh nùs rlau mờ ală càr Tây Nguyên tàm broă lơh yal tơnggit jơnau, mblàng yal jơnau. Anih lơh broă jơnau đơs Việt Nam rơp pơn jat tai bơcri priă geh bơta rơndap tap sèng ai ală Anih lơh broă sùm tàm lơgar đơs bal, Anih lơh broă sùm tàm tiah Tây Nguyên đơs is jơh bal bè cau lơh broă, phan bơna, bơta chài măi mok jat gùng dà mblàng yal jơnau uă bơta. Bơh hơ̆, tơnguh cồng nha pờ tơlik jơnau đơs ai ală tiah sar lơgar ngài, tiah uă kal ke in.