Dơ̆ pơrjum Ci ƀộ Đảng 4, Đảng ƀộ Hìu bơsram Kâp pe Hoàng Hoa Thám, kơnhoàl Lệ Thủy, càr Quảng Bình dipal ngan mờ bơta geh ngan. Bơh sơnrờp dơ̆ pơrjum, ală Đảng viên yal jơnau bè Wa Hồ. Tơngai lài, tàm ală dơ̆ pơrjum Đảng ờs mờng pah dơ̆, ală Ci ƀộ tàm Đảng ƀộ Hìu bơsram Kâp pe Hoàng Hoa Thám neh yal ală jơnau yal bè Wa Hồ nàng bơsram mờ lơh jăt. Tàm hơ̆ đơs loh ală broă gam ờ hềt dipal, gam geh tàm kwang bàng, đảng viên nàng ai geh gùng dà broă lơh bơsong, lơh niam wơl halà yal krơh cau niam, broă niam. Ùr pơgru Nguyễn Thị Thương, Ci ƀộ 4, Đảng ƀộ Hìu bơsram Kâp pe Hoàng Hoa Thám, kơnhoàl Lệ Thủy pà gĭt, lài mờ pah dơ̆ pơrjum, ală đảng viên rơcăng lài ală jơnau yal geh kwơ ngan bè Wa Hồ yal mờ đảng viên tàm Ci ƀộ in. Hơ̆ là ală jơnau yal “Dà duh dà mrềt”, “Tŭ jiơ dờng màng ngan”, “Bơngàn pòr tam pà 3”, “Dùl nơm àu ram”, “Bàr nơm mpàng tê”…Bơh tŭ lam lơh tơngume do, ală dơ̆ pơrjum Ci ƀộ gơlơh duh hồl ngan. Ùr pơgru Nguyễn Thị Thương, yal: Tềng đăp pah dơ̆ pơrjum Ci ƀộ, bol añ jòi ală pang sră niam, jơnau yal niam bè tơngume bơsram mờ lơh jăt bồ tơngoh, nùs nhơm, broă lơh mờ rài kis Hồ Chí Minh dê. Bơh ală jơnau yal do, bol añ ai geh ală jơnau bơsram ai să tờm tơl nă đảng viên in, bơh mpồl Ci ƀộ mờ jơh bal Đảng ƀộ in. Kung bơh hơ̆ ai geh ală jơnau bơsram bơh rài kis, mpồl bơtiàn tus dì tàm broă lơh.

Đảng ƀộ thị trấn Anih lơh sa sươn dờng Lệ Ninh, kơnhoàl Lệ Thủy, càr Quảng Bình geh mờr 500 nă đảng viên pơrjum tàm 12 Ci ƀộ. Pah nhai, kâp ủy bơyai lơh dùl dơ̆ cribơyai, rwah ală jơnau yal niam, geh kwơ bè Wa Hồ nàng yal ai ală đảng viên in iăt bal tàm lài mờ dơ̆ pơrjum ci ƀộ ờs mờng pah dơ̆. Ồng Nguyễn Thanh Hải, Ƀí thư Ci ƀộ Mpồl làng bol tiah drà Liên Cư, thị trấn Anih lơh sa sươn dờng Lệ Ninh, kơnhoàl Lệ Thủy, càr Quảng Bình pà gĭt: bơta krơi is bơh ci ƀộ dê uă ngan ală đảng viên là cau lơh broă sa, cau lơh broă den tàng broă mblàng yal lơh jăt Jơnau sồr sồ 05 bơh Ƀộ Cíñ trị pal ƀươn wă, dipal mờ bơta geh ngan mờ dong ală đảng viên gơtùi đòm jăt tàm rài kis, lơh broă. Dơ̆ pơrjum pa do ngan rlau jơh, geh bàr pe nă đảng viên lòt pơrjum jơla, gơrềng tus dơ̆ pơrjum Ci ƀộ. Tŭ do, ồng Nguyễn Thanh Hải, Ƀí thư Ci ƀộ neh yal jơnau yal bè Wa Hồ: “Tŭ jiơ dờng màng ngan- 10 phuk kung neh jơla ngan”. Bơh jơnau yal do, kâp ủy kờñ ală đảng viên sền swì is să tờm, gĭt sền dờng màng tŭ jiơ bơh să tờm, mpồl cau mờ gĭt sền dờng màng tŭ jiơ bơh cau ndai dê. Ồng Nguyễn Thanh Hải, đơs: Đảng viên lơh jăt tơl pah nhai, pe nhai, pah nam mờ lồi nam pơgồp bal mờ sền swì bơta niam đảng viên. Kờñ lơh niam tàm broă yal jơnau bè Wa Hồ mờ nàng lơh gơrề tàm rài kis, tàm làng bol den jơnau bơh sơnrờp bol añ tàm pơrjum ci ƀộ, săc rwah uă jơnau yal niam bè Wa Hồ, bè ală cau pơnrơ gơguh jak nàng bơsram, lơh jăt, tàm hơ̆ kung tơrgùm đơs loh ală jơnau ờ niam, jơnau ờ di tàm kwang bàng, đảng viên. Nùs nhơm bơh bol añ dê là lơh bơh ală broă dềt rơhền, ai tơmŭt tàm rài kis nùs nhơm đảng viên dê, wă wờng tơn bơh ală jơnau yal dềt.

Đảng ƀộ kơnhoàl Lệ Thủy, càr Quảng Bình geh 38 Đảng ƀộ mờ 19 Ci ƀộ gơwèt bal bal mờ 11 rbô 800 nă đảng viên. Lơh jăt Jơnau sồr sồ 05 bè lơh pràn bơsram mờ lơh jăt bồ tơngoh, nùs nhơm, broă lơh mờ rài kis Hồ Chí Minh dê, tus tŭ do, 100% Ci ƀộ Đảng tàm ù tiah kơnhoàl dê lam lơh jăt broă yal jơnau bè Wa Hồ, krơh cau niam broă niam tàm ală dơ̆ pơrjum Ci ƀộ. Ồng Lê Vĩnh Thế, Ƀí thư Huyện ủy kơnhoàl Lệ Thủy, càr Quảng Bình pà gĭt, yal jơnau bè Wa Hồ neh pơgồp bơnah tam gơl pa tơngume mờ tơnguh uă cồng nha pơrjum Ci ƀộ kâp hơđơm, bơh hơ̆ lơh gơlik bơta tam gơl niam tàm tơl nă kwang bàng, đảng viên mờ làng bol. Ală jơnau yal bè Wa Hồ bè bơta pràn lơh gơrề pràn kơldang, nàng đảng viên, làng bol in bơsram, đal gĭt loh kơnòl bơh he dê tàm broă lơh, nùs nhơm mờ tàm rài kis.

Ồng Lê Vĩnh Thế, Ƀí thư Huyện ủy kơnhoàl Lệ Thủy, càr Quảng Bình, đơs: Bol añ ai broă bơsram, lơh jăt bồ tơngoh, nùs nhơm, broă lơh mờ rài kis Hồ Chí Minh cih tàm ală Kơrnoăt lơh nền bơh Pơrjum Đảng ală kâp dê mờ broă lơh jăt gơ jăt bal mờ kơnòl broă cíñ trị tàm ƀòn lơgar, bè tàm: tơn jơh jơgloh tơrmù rƀah, sờr ntrờn ù tiah hìu đam, bơ̆t bơtàu ƀòn lơgar pa. Lệ Thủy kung lơh 5 jơnau sồr gơ jăt bal mờ bồ tơngoh, nùs nhơm Hồ Chí Minh dê, jun rê tàm ală đảng ƀộ, ci ƀộ lơh jăt ngan ngồn ai tơl nă đảng viên in. Sùm pơgồp bal broă do mờ kơnòl lơh krơh cau lam bồ, đảng viên lơh krơh bal mờ nùs nhơm đảng viên lòt lài, làng bol ƀòn lơgar lòt jăt tơnơ̆ nàng kờñ ngui niam bơta pràn tơrgùm bal bơh làng bol tàm ù tiah kơnhoàl dê.