Đơs tàm Pơrjum yal Rơndăp ù tiah càr Kon Tum tơngai bơh nam 2021 tus 2030, wèt tus nam 2050, Phó Thủ tướng Cíñ phủ Trần Hồng Hà đơs nền, Rơndăp ù tiah càr Kon Tum geh ai tàm bơta tơrgùm bal bơtàu tơnguh tiah Tây Nguyên dê, tơrbŏ bal mờ tiah jăt gah dà lềng tàm gùl lơgar mờ tiah dềt Mê Kông dê.

Rơndăp ù tiah geh là cơng tàng adăt boh lam kwơ màng pờ geh ală bơta niam, bơta pràn bơtàu tơnguh pa càr Kon Tum dê mờ 4 bơta tờm, tàm hơ̆ geh: lơh gơs tiah phan lơh sơnơm tờm dà lơgar dê; bơtàu tơnguh lơh sa kông nghệ kao, lơh sa mờ măi mok lơh gơs phan; bơtàu tơnguh năng lượng lơh geh wơl mờ lòt nhơl càr Kon Tum dê geh gơs gah lơh sa tờm ngan. Jơnau kờñ bơtàu tơnguh geh ai là tus nam 2030, càr Kon Tum gơs càr bơtàu tơnguh mhar, tơl ală bơta, kơl jăp mờ ndrờm bal ai bơh lơh sa tơlir, lơh sa gơlòt bal geh uă bơta niam chài jơi bơtiàn dê.