Lơh jat gùng dà broă lơh bơh Đảng mờ Dà lơgar dê, tàm ală nam do, ală tiah tàm tiah Tây Nguyên lơh jat geh cồng nha Broă lơh jơnau kờñ dà lơgar tơrmù rƀah kơnhăp kơ̆ mờ Broă lơh jơnau kờñ dà lơgar bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau mờ tiah kơh bơnơm. Bơh hìu bơnhă rƀah, hìu bơnhă bi H’ Phương Knul (kòn cau Rơđê), ơm tàm ƀòn Tuôr, sàh Hòa Phú, càr Dăk Lăk neh geh Dà lơgar dong kờl càn priă bơcri dong kờl ờ sa priă cồng uă nàng bơcri priă lơh sa geh cồng nha, tŭ do neh geh rài kis kơ̆ kơl jăp mờ lơh geh hìu ơm kơnhăp kơ̆:“Lài do hìu bơnhă añ gơwèt hìu bơnhă rƀah, ờ geh hìu ơm. Dà lơgar dong kờl dùl bơnah, hìu bơnhă añ tềm pềr tai hơ̆ sồng lơh geh hìu ơm do. Mơya broă lơh ờ hềt geh sùm, gam kơlôi rcang ai oh kòn in lòt bơsram sră. Añ kơ̆p kờñ Dà lơgar pơn jat tai sền gròi, lơh geh broă lơh mờ priă lơh geh sùm ai ală hìu bơnhă gam kal ke tàm ƀòn in”.

Pơrjum dờng cau ala mat gùt lơgar dơ̆ 14 Đảng dê sền gĭt jơnau kờñ tàm 5 nam tus, khà hìu bơnhă rƀah jat jơnau sồr ală bơta tơngai bơh nam 2026-2030 gơmù kờp bal bơh 1 tus 1,5 điềm bơnah rơhiang pah nam. Lơh ngan ngồn gùng dà pơlam do, Jơnau lơh nền tàm pơrjum bơh Pơrjum dờng Đảng ƀộ càr Dăk Lăk dê tơngai lơh broă bơh nam 2025–2030 ai tơlik jơnau kờñ khà hìu bơnhă rƀah gùt càr gơmù bơh 2% dùl nam rlau hơđang; khà hìu bơnhă rƀah là làng bol jơi bơtiàn dồ ết nă cau gơmù bơh 3% dùl nam rlau hơđang. Nàng lơh geh jơnau kờñ hơ̆, càr pơn jat tai ai lơh lài bơtàu tơnguh lơh sa, lơh li la broă lơh sa, rề ơnàng ală broă lơh tơrmù rƀah di pal tơl tiah dê. Mò Nguyễn Thị Nguyên Thảo, Phó Củ tịc Duh broă sùm Anih duh broă Làng bol càr Dăk Lăk, pà gĭt: “Tơngai bơh nam 2026–2030, càr pơn jat tai lơh geh ală bơta ƀuơn ngan nàng ai priă bơcri, broă lơh mpồl bơtiàn tus mờ làng bol; lơh jat Jơnau sồr sồ 39 bơh Mpồl đơng lam Đảng dê, tơnguh uă cồng nha ngui priă bơcri, ai priă bơcri gơ lòt mut tàm broă lơh sa, kă bro, lơh geh tai bơta pràn ai bơtàu tơnguh ƀòn lơgar pa, bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau, tiah kơh bơnơm in, gàr tơl niam rài kis mpồl bơtiàn tàm ù tiah càr dê in”.

Tơnơ̆ tŭ Pơrjum dờng dơ̆ 14 Đảng dê, càr Khánh Hoà rcang lài, lơh ngan ngồn nùs nhơm “rơwah di- lam lơh mhar- lơh tus gùng tus dà- đo was mờ cồng nha”, tơrgùm tam gơl niam tiah bơcri priă, sơlơ tơnguh tai ală bơta tờm gơguh lơh sa, lơh geh bơta pràn lơh ngan ngồn jơnau kờñ gơ gơs ƀòn dờng gơwèt Dà lơgar lài mờ nam 2030. Tàm jơnau sồr đơng lam, Củ tịc Anih duh broă Làng bol càr Khánh Hoà ồng Trần Phong đơs sùm jơnau sồr tơnguh mhar tơl làm tàm ală gah tờm; sồr ală sờh, gah broă, ală tiah bơt bơtàu broă rơndăp lơh geh ngan; tơrgùm tă bơsong bơta kòl yan, tơnguh uă bơta pràn jak tàm pơrlòng mờ cồng nha drơng broă làng bol mờ mpồl lơh sa kă bro:“Sồr ală sờh, gah broă, ală tiah bơt bơtàu broă rơndăp lơh geh ngan jat pah nhai, geh tŭ jat pah poh; tơrgùm tă bơsong bơta kòl yan, tam gơl niam tiah bơcri priă lơh, tơnguh uă bơta pràn tàm pơrlòng mờ cồng nha drơng broă làng bol mờ mpồl lơh sa kă bro. Tơl gơnoar broă bơh tơl mpồl lơh broă dê, ală oh mi pal rcang lài lam lơh”.

Tàm uă bơta lơh ngan wèt tus sùm gơguh 2 nơm khà sồ, lam Khánh Hoà gơ gơs ƀòn dờng gơwèt Dà lơgar, gah broă bơt bơtàu sền bal geh gơnoar broă bơt bơtàu mòn lơh tơngume. Kwang lam bồ Sờh Bơt bơtàu càr Khánh Hoà ồng Nguyễn Thành Phú pà gĭt, gah broă bơt bơtàu rơ̆p tơrgùm tơnguh uă cồng nha rơndăp ù tiah, bơtàu tơnguh dồ ròt bal tiah drà mờ phan bơna bơt bơtàu bơta chài măi mok jat gùng dà broă lơh tơngai pa, kơnhăp kơ̆, drơng broă niam ngan rlau jơh ai jơnau kờñ bơh càr dê: “Bol añ rơ̆p pơn jat tai lơh ngan, mờ nùs nhơm lơh ngan cíñ trị uă ngan rlau jơh, tơrgùm lam lơh ală kơnòl broă Tỉñ ủy càr, Anih duh broă Làng bol càr dê jàu; tờm ngan là tơnguh uă cồng nha rơndăp ù tiah, bơtàu tơnguh ring bal tiah drà mờ phan bơna bơt bơtàu măi mok, pơgồp bal mờ bơtàu tơnguh lơh sa tơlir, lơh sa dà lềng mờ lòt nhơl lơh geh bơta gơn kơnờm bơtàu tơnguh bal ai jơh gùt càr in”.

Tây Nguyên mờ tiah jat kềng gah dà lềng đah Jum tàm gùl lơgar là tiah nhàr lơgar- bồt bơlào dà lềng. Tơnơ̆ tŭ Pơrjum dờng cau ala mat gùt lơgar dơ̆ 14 Đảng dê lơh geh cồng nha niam bơnĕ, Thượng tướng ồng Đỗ Xuân Tụng, Kwang bàng Đảng Dà lơgar, Phó Kong kơnòl Tổng Kụk Cíñ trị Ling klàng Làng bol Việt Nam neh geh dơ̆ lơh broă tàm Mpồl đơng lam Mpồl ling sền gàr tiah nhàr lơgar càr Dăk Lăk, Thượng tướng sồr Mpồl ling sền gàr tiah nhàr lơgar càr Dăk Lăk bơsram lơh jat, gờñ lam lơh ai Jơnau lơh nền tàm pơrjum bơh Pơrjum dờng dơ̆ 14 Đảng dê gơ lòt mut tàm bơta geh ngan:“Lài ngan pal kơlôi sơnơng, bơsram lơh jat, lơh ngan ngồn Jơnau lơh nền tàm pơrjum bơh Pơrjum dờng dơ̆ 14 Đảng dê, lơh jat ngan ngồn nùs nhơm đơng lam sồr bơh bơh Tổng Ƀí thư dê là “2 kơ̆ nùs, 2 lơh pràn, 2 rcang lài kơryan” mờ 5 kơ̆”. Tổng Ƀí thư đơs tơrgùm bal tơngume là lơyah niam, ƀuơn kah mơya neh geh bal jơh bè jơh ală tơngume sồr lơh gơwèt mờ Mpồl ling klàng đơs bal, gơwèt mờ Mpồl ling sền gàr tiah nhàr lơgar đơs is”.

Gơtùi gŏ, nùs nhơm Pơrjum dờng cau ala mat gùt lơgar dơ̆ 14 Đảng dê gam mhar ngan lơh gơrề uă gơ lòt mut tàm rài kis mờ ală broă lơh lơh broă geh ngan, di mờ bơta geh ngan tàm tơl tiah, tơl gah broă dê. Jơh ală gam bơnĕ bơnài bal cơnđoà lòt tàm nùs nhơm gờm chờ Đảng, gờm chờ nam pa nam Ơseh 2026.