Tàm ală càr, mpồl bơyai lơh tĕ khà bơh kâp càr tus kâp sàh, sơnah ƀòn, tiah is ồn neh geh pồ tơl gờñ. Anih duh broă tĕ khà ală kâp geh tơng gơs di jơnau sồr, gơ jat bal mờ ală mpồl dềt mìng dùl kơnòl bè kwang bàng, mblàng yal, drơng broă, sền gàr lơngăp lơngai – lơh sơnơm mờ bơsong bơta yal yă, yal khài. Ală tiah rơcang lài bơt bơtàu broă rơndap lơh mùl màl, jàu kơnòl loh cau, loh broă, gàr tơl broă ndrờm lam lơh di tŭ tơngai hơ pơrgon, di adat boh lam. Bơdìh mờ broă rơcang phan bơna, broă lơh mblàng yal, ngan là tàm internet, geh ală tiah sền gròi uă ngan.

Tềng đap bơta gơguh uă ală jơnau yal tơnggit ờ ngan, blơ̆ blac bè dơ̆ tĕ khà, gơnoar atbồ mờ làng bol neh crăp rơcang kơryan bơh gờñ, bơh ngài. Ờ lời gơtìp rơ mơp ndơl, nisơna tàm tơl broă gơlik geh, ală broă rơndap lơh sền gàr lơngăp lơngai, rơndap tap sèng geh lam lơh ndrờm bal tàm ală càr tiah kềng gah dà lềng đah jum tàm gùl lơgar mờ Tây Nguyên.