Lŏ Đỗ Thị Mỹ Duyên, 24 sơnam, tàm sơnah ƀòn Buôn Ma Thuột, càr Dăk Lăk pà git, internet mpồl bơtiàn tŭ do là anih lŏ tìp bal, pơ-rài bồ tơngoh, mờ là anih sền jơnau tơngit jơnau gơlik geh pah ngai. Tàm hơ̆ uă ngan tàm dơ̆ gơtìp rềs àr bơh trồ tiah, mìu càl dờng, dà tih dà cò, dong klàs cau gơtìp rềs àr jal mhar den internet mpồl bơtiàn sùm geh jơnau tơngit uă bơta. Bơta ờ niam là jơnau yal tơngit tàm anih do jŏ pa geh bal, geh uă tŭ ờ di pal. Bơh dơ̆ mìu càl dờng, dờng ngan bơh lài tus tŭ do lơh aniai tàm Tây Nguyên mờ Đah jum Tàm gùl lơgar, lŏ Duyên ngui uă internet mpồl bơtiàn mờ gŏ ală fanpage bơh mpồl kwang àng dê, neh mờ gàr mhar, uă bơta mờ pin dờn rơlao.

Bơh tŭ hơ̆, lŏ Đỗ Thị Mỹ Duyên sùm sền jơnau tơngit tàm ală pang do: “Añ mờng pờ sền tàm facbook, tàm hơ̆ mờng pờ sền tàm pang bơh Kwang àng càr Dăk Lăk. Tàm hơ̆ mờng tơlik ală rùp, jơnau tơngit, jơnau yal ală cau tìs mờ Adăt gùng lòt ù gờl. Ha là pa do ngan là uă rùp bè broă dong klàs cau gơtìp rềs àr tàm tiah dà tih dà cò tàm ală sàh đah măt tơngai Lik (càr Phú Yên lài do). Añ kung sùm tam pà wơl, mờ ờ ngòt jơnau yal tơngit ờ ngan”.

Lơh jăt jơnau sồr bơh Ƀộ Kwang àng dê bè tam gơl sồ, ngui bơta chài măi mok tàm broă lơh, ală mpồl lơh broă gơwèt Kwang àng càr Dăk Lăk ndrờm lơh geh fanpage. Bơh hơ̆, mpồl kwang àng lơh pràn broă mblàng yal, yal adăt boh lam; dờp jơnau yal bơh làng bol dê, pơgồp bal tàm broă gàr niam lơngăp lơngai mờ tam dră mờ ală nùs nhơm kơlôi sơnơng ờ di. Trung tá Trần Viết Nghĩa, Kwang lam bồ Mpồl mblàng yal, bơto bơtê Cơl dŭ lơh broă cíñ trị Kwang àng càr Dăk Lăk pà git, fanpage “Kwang àng càr Dăk Lăk” geh mpồl drơng lơh, tŭ do geh rơlao 121 rơbô nă cau sền gròi, mờr 9 tơlăk dơ̆ boh bơr.

Ờ mìng tơlik cih ală jơnau yal tơngit mblàng yal adăt boh lam, lơngăp lơngai mpồl bơtiàn, dờp jơnau yal, hơ jơnau mblàng, jơnau yă cau tìs bơh làng bol dê, mờ gam là anih pờ tơlik jơnau hòi jà tam klăc bal, tam pà bal, dong kờl làng bol gơtìp rềs àr. “Tàm dơ̆ dà tih dà cò pa do, tàm sàh Hoà Thịnh geh dùl nă cau ùr geh bun rơcang deh kòn, mơya gơtìp kơrian is tàm dà tih. Jơnau yal geh bol añ di tŭ pờ tàm fanpage mờ tơnơ̆ mờ hơ̆, mpồl dong klàs cau gơtìp rềs àr Kwang àng sàh Hoà Thịnh neh tus, mhar cèng cau ùr geh bun do tus hìu sơnơm nàng deh kòn di tŭ. Añ đơs là do là broă dong kờl di tŭ ngan, mùl màl ngan bơh fanpage dê tus mờ làng bol”.

Dùl fanpage geh cồng nha ndai bơh kwang àng càr Dăk Lăk dê là “Cơl dŭ lơh broă Kảñ sát gùng lòt càr Dăk Lăk”. Fanpage do tŭ do geh rơlao 33 rơbô nă cau sền gròi, mờ rơlao 500 dơ̆ cau sền pah nhai. Do là anih mblàng yal Adăt boh lam Gùng lòt ù gờl; di tŭ pờ sền ală broă gơrềng bal tus mờ lơngăp lơngai gùng lòt mờ lơngăp lơngai mpồl bơtiàn. Bơh tàm fanpage do, Cơl dŭ lơh broă Kảñ sát gùng lòt gam dờp rùp, clip yal bơh làng bol dê bè ală cau tìs tàm gùng lòt, kă bro phan gơtìp kơrian ờ ai… Trung tá Nguyễn Khiếu Nam Vũ, drơng broă tàm pang yal tơngit “Cơl dŭ lơh broă Kảñ sát gùng lòt càr Dăk Lăk”, pà git: “Mpồl lơh broă neh geh tai dùl anih yal tơngit nàng dờp jơnau yal bơh làng bol dê. Bơh tŭ hơ̆, cơl dŭ lơh broă neh lơh glài mờr 100 nă cau tìs, mờ kờp jơh khà priă rơlao 300 tơlăk đong. Bè: nggùl nhai 12 pa do, bơh jơnau yal làng bol dê tàm pang fanpage mờ clip 2 nơm rơndeh pơn diang năc sơrlèt ờ di gùng, bol añ neh sền, git mờ lơh glài 2 nơm rơndeh pơn diang năc tìs do. Mùl màl, bè ồng Đ.V.P. tàm sàh Tuy Đức, càr Lâm Đồng măi rơndeh ôtô geh ƀàng sồ 48B-000.XX gơtìp lơh glài 5 tơlăk đong mờ tơrmù 2 điểm pang sră măi rơndeh”.

Jơh ală cơl dŭ lơh broă bal mờ kwang àng 102 sàh, sơnah ƀòn gơwèt Kwang àng càr Dăk Lăk ndrờm neh lơh geh fanpage, uă pang geh gal cau sền uă, geh pang fanpage geh git nđờ rơhiang rơbô dơ̆ cau kờñ mờ sền. Tơngu me pờ geh lơh niam, uă bơta, bơh tàm broă mblàng yal bè adăt boh lam, gàr niam lơngăp lơngai mpồl bơtiàn tus mờ ală broă dong klàs cau gơtìp rềs àr, lơh geh uă cau niam broă niam mờ tam dră mờ ală jơnau yal tơngit tìs ờ di geh cồng nha. Ồng Nguyễn Quốc Hiệp, Phó Kwang lam bồ Sờh Niam chài, Tàp pràn să jan mờ Lòt nhơl càr Dăk Lăk đơs, do là broă lơh mblàng yal gơdờp ngan mờ rài tam gơl sồ tŭ do dê. “Tàm tơngai tus, Sờh pơn jăt tai pơgồp bal geh cồng nha rơlao tai mờ ală mpồl lơh broă tàm mpồl Kwang àng càr Dăk Lăk dê nàng tơnguh broă mblàng yal uă rơlao tai, dong kờl làng bol geh tìp mhar, di tŭ jơnau yal tơngit tàm ală pang fanpage mpồl Kwang àng dê tus mờ làng bol. Pơn jăt tai yal ală pang do tus mờ làng bol, tàm hơ̆ uă ngan là làng bol kis tàm tiah ngài, tiah làng bol jơi bơtiàn ờ gal cau, nàng git ală pang fanpage do uă rơlao tai”.

Mùl màl pà gŏ, ală pang fanpage bơh Kwang àng càr Dăk Lăk dê ờ mìng là anih yal tơngit mùl màl tàm internet, mờ neh gơs anih tơrbŏ bal đềt mềr, pin dờn đah mpồl kwang àng mờ làng bol dê. Tàm do, jơnau yal tơngit geh tam pà bal mhar, di pal; jơnau yal bơh làng bol geh iăt, bơsong di tŭ, pơgồp bal gàr niam lơngăp lơngai, lơh geh loh làng nùs nhơm “tài làng bol drơng lơh” tàm rài tam gơl sồ dê.