Đơs tàm dar pơrjum, Thủ tướng ồng Phạm Minh Chính đơs loh nùs nhơm lơh jăt mhar Jơnau lơh nền tàm Pơrjum dờng gùt lơgar dơ̆ XIV Đảng dê, den tàng pal bơyai lơh mơ pơrjum nàng ai jơnau lơh nền tàm pơrjum mŭt tàm rài kis.

Thủ tướng đơs là, ală cồng nha tàm tơngai lơh broă pa do là bơta pràn kwơ màng ai broă pơrlòng pa tàm tơngai lơh broă do in mờ tơrgùm tàm 9 gùng dà broă lơh dờng bè broă pơrlòng bè Tổng Ƀí thư ồng Tô Lâm neh đơs tàm Pơrjum dờng pơrlòng kờñ gơboh dà lơgar gùt lơgar dơ̆ XI bè: tơrgùm tàm broă tam gơl pa bơceh lơh, bơtàu tơnguh lơh sa mpồl bơtiàn, sền gàr dà lơgar lơngăp lơngai, niam chài mờ bơ̆t bơtàu mpồl lơh broă cíñ trị pràn kơl dang nàng ai dà lơgar mŭt tàm rài bơtàu tơnguh pràn kơl dang, gơguh jăk. Jăt mờ hơ̆, sồr bơ̆t bơtàu broă rơndăp lơh, tam pà mùl màl tus tơl anih lơh broă, mpồl lơh broă nàng lơh ală broă pơrlòng. Thủ tướng sồr lơh geh bơta tàm dơlam, jơnau kờñ nùs nhơm, kơnòl broă nàng lơh jăt broă pơrlòng tam gơl pa bơceh lơh mờ tam gơl sồ.