Is mờ nùs nhơm chờ bè ală nam, tiah tam bơkào Bình Kiến, đah măt tơngai lik càr Dăk Lăk tàm ală ngai do ngềt ngơ̆t rơlao tơnơ̆ mờ gơrềng bơh mìu càl dờng sồ 13 mờ mìu dà tih dà cò tàm ngggùl nhai 11 nam 2025. Mơya, tàm ală bă suơn tam bơkào, làng bol lơh broă sa suơn sre kung gam ntoăt pơrlòng mờ tŭ tơngai. Ală suơn tam bơkào kúk gơtìp pă geh tơn tào wơl mờ gai gle, ală bă ù gơlời gời tài tờm bơkào chơ̆t geh wàs nàng tơrgùm bơta pràn ai ală gri bơkào gam tai in.

Do là tơngai lơh ngan nàng ai phan geh lơh tăc tàm drà di tàm Satềp nam pa Ơseh 2026 in. Bơta kal ke dờng ngan bơh làng bol tŭ do dê là priă nàng lơh sa. Tơnơ̆ mờ dà tih dà cò, priă tă nàng blơi phơng, sơnơm sền gàr phan tam bal mờ ơpah cau lơh broă nàng lơh niam wơl suơn tam bơkào ndrờm gơguh uă, lơh geh tai bơta kal ke tus mờ làng bol lơh broă sa, tŭ priă neh tă jơh tàm tơngai bồ kàl. Mò Nguyễn Thị Liên, tàm sơnah ƀòn Bình Kiến pà git: “Añ lơh niam wơl bơh sơnrờp, añ bơsong wơl, ròng wơl, sih phơng, ƀồm sơnơm wơl, priă ngai lơh broă gơtìp roh uă rơlao. Kơ̆p kờñ geh tơnhào uă nàng geh priă tài tŭ do neh tă uă ngan priă”.

Tàm ală bă suơn tam, broă sền gàr gam mŭt tàm tơngai kwơ màng ngan: pic cồng bơkào pa căt mờ koh ntê nàng lơh jăt tơngai lì bơkào. Tài khà broă lơh uă mờ jơnau kờñ bơta chài kung uă, ală hìu làng bol pal ơpah tai cau lơh broă, lơh priă tăc sơlơ gơguh uă. Mò Huỳnh Thị Nho pà git: “Tơngai do là tơngai lơh niam bơkào, tuh phơng nàng niam. Tơnơ̆ mờ dơ̆ dà tih dà cò den sền gàr bơkào kal ke ngan, mìu càl dờng neh lơh hoàc huơr uă, ngai lơh broă ơpah kung gơguh priă sơl. Tam bơkào mìng kơ̆p kờñ tăc gơtùi, geh đao bơnah lơi”.

Jăt jơnau kờp ing, sơnah ƀòn Bình Kiến geh rơlao 50 lồ ù tam bơkào kuk ală bơta. Tŭ do, tàm pơgăp 50% khà bơkào tàm ală suơn ờ hoan gơtìp neh geh cau blơi dan blơi bơh gờñ. Gơwèt mờ ală bă suơn gam tai, làng bol kung gam geh sùm broă sơnka sền gàr mờ sền gròi nền nòn mờ bơta tơngŏ bơh drà kă bro dê. Mò Nguyễn Thị Hiền pà git: “Cau blơi kung lòt sền nàng dan blơi, lùp priă tăc sùm. Tŭ do bơkào neh mờr lơh gơs bloh, kơ̆p cồng căt bồ bơkào hơ̆ sồng blơi”.

Nàng lơh broă bal mờ làng bol, gơnoar atbồ sơnah ƀòn neh rơcang lơh ală gùng dà broă lơh nàng tơrbŏ bal drà kă bro, dong kờl tăc bơkào nàng lơh gơmù ờ uă ngan rềs àr tus mờ làng bol dê tơnơ̆ mờ dùl nam rềs àr bơh trồ tiah lơh aniai gơtìp kal ke ngan. Ồng Lương Thảo Nguyên, Phó Củ tịc Anih duh broă Làng bol sơnah ƀòn Bình Kiến, càr Dăk Lăk pà git, sơnah ƀòn gam lơh ngan pơgồp bal nàng jòi geh anih tăc kơl jăp, dong kờl làng bol lơh broă sa iang nùs tàm tơngai jal mhar bơh kàl tam bơkào Satềp dê. “Anih duh broă làng bol sơnah ƀòn geh broă rơndăp lơh, bơyai lơh gùng bơkào nam pa tàm gơl gùng ngai 1 nhai 4, ai ală bă ù nàng tăc bơkào, pơgồp bal mờ broă bơka niam tờm chi nàng lơh geh tiah tăc bơkào, dong kờl làng bol tăc bơkào ƀuơn di tàm Satềp”.

Bŭ lah gơtìp mờ uă tam gơl bè trồ tiah bal mờ priă tă, mơya mờ nùs nhơm rơcang lài bơsong, cau tam bơkào Bình Kiến gam lơh ngan jơh pràn nàng kàl tam bơkào Satềp nam do geh cồng nha uă ngan.