Đơs mut lơh dar pơrjum, Thủ tướng ồng Phạm Minh Chính đơs loh, Ƀộ Cíñ trị ai lơh jat 9 jơnau lơh nền tàm pơrjum mìng dùl tơngume, geh jơh ală broă kuơmàng dà lơgar dê bè: lơh sa nă să is, lơh sa dà lơgar, lơh sơnơm, bơto bơsram, kơrnuat boh lam, lơh sa mờ lơgar ndai, năng lượng, niam chài. 

Do là bơnàng jă cíñ trị kuơmàng ngan nàng lam lơh jat 2 jơnau kờñ 100 nam. Bè lam lơh jat jơnau lơh nền tàm pơrjum sồ 79 bơh Ƀộ Cíñ trị dê bè bơtàu tơnguh lơh sa dà lơgar, Thủ tướng sồr ală kwang geh jơng tàm Mpồl sồr lơh tơrgùm ai jơnau đơs bè jơnau rơcang cih Jơnau lơh nền tàm pơrjum bơh Cíñ phủ dê ai lơh jat broă lam lơh jat Jơnau lơh nền tàm pơrjum sồ 79 mờ jơnau đơs “pơnđơl uă, lơh ngan dờng, lơh broă kràñ cê” mờ jàu kơnòl 6 loh “loh cau, loh broă, loh tŭ tơngai, loh gơnăp gơnoar, loh kơnòl mờ loh phan lơh gơs” nàng lam lơh jat geh cồng nha. Mờ nùs nhơm mblàng yal, lam lơh jat geh cồng nha, Thủ tướng kơp kờñ ală cau ala mat tơrgùm bồ tơngoh jak, dà kơl hề, tă pơgồp jơnau đơs nàng lơh gơs kơrnuat boh lam, geh ală gùng dà, broă lơh dong kờl nàng lam lơh jat.