Lam lơh jơnau ring bal lơh broă bal bơtàu tơngguh lơh sa- mpồl bơtiàn đah ală càr tiah Tây Nguyên mờ ƀòn dờng Hồ Chí Minh, ngai 29/11, tàm ƀòn dờng Kon Tum, Anih duh broă Làng bol càr Kon Tum mờ Mpồl ătbồ Tiah broă lơh sa sươn sre măy mŏk pa ƀòn dờng Hồ Chí Minh pơgồp bal bơyai lơh Pơrjum cribơyai Jak chài “Tam gơl sồ tàm broă lơh sa sươn sre, tŭ niam tàm tơrbŏ măy mŏk đah Tây Nguyên mờ ƀòn dờng Hồ Chí Minh”.

Pơrjum cribơyai geh bơta tus bal bơh 150 nă cau ala măt dê. Yal tàm pơrjum cribơyai, tam gơl sồ tàm broă lơh sa sươn sre tàm Tây Nguyên kung gam sơl là dồ broă lơh pa ngan, tìp mờ uă bơta lòng is ồn là bè phan bơna măy mŏk mờ bơta gĭt ngui măy mŏk bơh làng bol lơh broă sa dê. Broă lam lơh tam gơl sồ hơ pơrgon cèng wơl ală tam gơl pràn ngan, dong ală càr Tây Nguyên ờ mìng bơtàu tơngguh pràn kơldang mờ gam bơtàu tơngguh kơ̆ kơl jăp rlau. Ală cau ătbồ, cau gĭt wă jrô broă do, cau jak chài, mpồl lơh sa kă bro mờ cau dồ nă să is neh cribơyai bal, ai geh gùng dà broă lơh pơgồp bơnah ai tơl bơta ală broă lơh tam gơl sồ in tàm gah broă lơh sa sươn sre tàm tiah do in; lơh pràn jăt ngui jak chài măy mŏk tàm lơh broă sa sươn sre; tơngguh tai tŭ niam lơh broă bal, tàm tơrbŏ drà jak chài mờ măy mŏk, phan bơna đah ală càr tiah Tây Nguyên mờ ƀòn dờng Hồ Chí Minh.

9 jơnau cih tă pơgồp jơnau đơs sền tơn, 24 jơnau cih tă pơgồp jơnau đơs pơyua tus pơrjum cribơyai in bơh ală cau ătbồ, cau gĭt wă jrô broă do, cau jak chài, mpồl lơh sa kă bro mờ cau dồ nă să is kung neh mblàng sền loh bơta geh ngan tam gơl sồ gah broă lơh sa sươn sre ală càr tàm tiah Tây Nguyên; pà gĭt ală broă kờñ pal lơh broă bal ai tơl bơta tam gơl sồ mờ bơtàu tơngguh broă lơh sa sươn sre kơ̆ kơl jăp đah ală càr tiah Tây Nguyên mờ ƀòn dờng Hồ Chí Minh in; yal tơnggĭt ală jăt ngui măy mŏk pa tàm gah broă lơh sa sươn sre.