Nhai 11 nam 2021, Mpồl Tam klăc Cau ùr Dà lơgar Việt Nam pơgồp bal mờ Anih duh broă Jơi bơtiàn bơyai lơh bơsram, lam lơh jăt broă lơh tus 51 càr, ƀòn dờng là tiah làng bol jơi bơtiàn dồ êt nă cau. Rơndăp broă lơh “lơh jăt ring bal ùr klau mờ bơsong ală broă kờñ ngan gơ wèt mờ cau ùr mờ kơnòm dềt” là dùl tàm 10 rơndăp broă lơh bơnah gơ wèt broă lơh jơnau kờñ dà lơgar bơtàu tơngguh lơh sa- mpồl bơtiàn tiah jơi bơtiàn dồ êt nă cau mờ tiah kơh bơnơm tơngai bơh nam 2021- 2030. Rơndăp broă lơh bơh Mpồl Tam klăc Cau ùr Dà lơgar Việt Nam geh jàu đơng lam lơh mờ lam lơh jăt. Do kung là dơ̆ sơnrờp tàm broă lơh jơnau kờñ dà lơgar bơtàu tơngguh lơh sa mpồl bơtiàn tiah jơi bơtiàn dồ êt nă cau mờ tiah kơh bơnơm geh is dồ rơndăp broă lơh bơnah bè ai tơl bơta ring bal ùr klau in.

Mpồl Tam klăc Cau ùr Dà lơgar Việt Nam neh lơh pràn lam lơh ală broă lơh mblàng yal bè rơndăp broă lơh 08 bơh ală broă lơh mblàng yal jơnau, tìp măt bơyai tàm ală gah mblàng yal jơnau mpồl bơtiàn. Pơgồp bal mờ ală ƀộ, gah geh gơrềng lơh jăt ală tơnggume, broă jàu bơh rơndăp broă lơh 08 dê gơrềng tus gơnoar broă, kơnòl broă bơh gah dê.

Bal mờ ală broă lơh dong kờl bơh Mpồl Tam klăc Cau ùr Dà lơgar dê, Mpồl Tam klăc Cau ùr ală kâp tàm ală tiah kung neh tơrgùm bơta pràn lam lơh ală broă lơh tơrlòng lài lơh broă tàm 08 xã sồr lơh lài, neh tơnggơs mờ lơh broă sùm geh 32 broă lơh tơrlòng lài mpồl mblàng yal jơnau mpồl bơtiàn, 4 Anih pin dờn, 4 Mpồl cau ătbồ bơh bơta tam gơl mờ bơyai lơh geh 4 dơ̆ tìp măt boh bơr gùng dà broă lơh. Sền gròi, bơyai lơh broă lơh bơto pơlam tơngguh uă pràn jak ai ùr kwang bàng là jơi bơtiàn dồ êt nă cau in. Pơlam tàp, bơto pơlam, jăt sền, sền swì bè ring bal ùr klau, tơngguh uă pràn jak pơgồp bal ùr klau ai kwang bàng kơnhoàl, xã mờ thôn ƀòn in.

Jăt mò Trần Lan Phương, Phó Củ tịc Mpồl Tam klăc Cau ùr Dà lơgar Việt Nam dê đơs, tơnơ̆ 03 nam lam lơh ală broă lơh mblàng yal jơnau, tơngguh uă pràn jak ai ùr kwang bàng jơi bơtiàn dồ êt nă cau in, tơngguh uă pràn jak pơgồp bal ùr klau ai kwang bàng in tàm ală anih lơh broă cíñ trị, ală kra ƀòn, kwang ătbồ ƀòn, cau geh bơngă pin dờn tàm mpồl bơtiàn mờ bơyai lơh tìp măt boh bơr gùng dà broă lơh kâp xã mờ mpồl thôn ƀòn neh geh mpồl, anih lơh broă mờ Mpồl Tam klăc Cau ùr ală càr rơndăp lam lơh ndrờm bal, dong kờl tàm xã lơh lài. Mò Trần Lan Phương, đơs: Ală broă lơh sồr lơh lài bơh sơnrờp lơh geh bơta tam gơl niam ngan tàm bơta gĭt wă, broă lơh bơh làng bol dê, pơgồp bơnah tam gơl bơta mờng kơlôi bơta mờng lơh, sang jơh bồ tơnggoh kơlôi sơnơng tam cah ờ rờm bal ùr klau mờ tơrmù ƀà bơta gơrềng bơh ală broă mpồl bơtiàn kờñ ngan dê gơ wèt mờ cau ùr mờ kơnòm dềt.

Mò Lò Thị Thu Thủy, Kwang bàng Mpồl Kwang ătbồ, Kwang ătbồ Mpồl Jơi bơtiàn- Pin dờn jăt yàng, gơ wèt Mpồl Tam klăc Cau ùr Dà lơgar Việt Nam pà gĭt: ală mpồl lơh broă bơh Mpồl Tam klăc Cau ùr Dà lơgar dê neh lơh ală sră pơ àr bơto pơlam tơnggơs, đơng lam lơh broă mờ sră pơ àr drơng ai broă lơh mblàng yal, bơyai lơh pơrjum bơh ală broă lơh tơrlòng lài dê. Ngan là ală broă lơh tơrlòng lài  Mpồl “Cau ătbồ bơh bơta tam gơl dê”. Lơh tam gơl ală sră pơ àr bơh bơta video, rùp hiñ sền gŏ ngan ngồn mờ măt, duh hồl ngan ngồn, dipal mờ tơl nă cau. Mò Lò Thị Thu Thủy, đơs: Bơh broă lơh pơlam tàp, bơto pơlam tơngguh uă pràn jak ai kwang bàng Mpồl mờ kwang bàng ală gah geh gơrềng tàm kâp xã bè tơnggơs, đơng lam lơh broă mờ tơngguh uă cồng nha lơh broă bơh ală broă lơh tơrlòng lài dê neh geh ală Mpồl lơh broă Mpồl Dà lơgar sền gròi lơh jăt sùm pah nam. Mơkung sơlơ dong kờl tai bơta chài ai ƀòn lơgar să tờm ătbồ tơn in, lơh broă lơh tơrlòng lài. Lam lơh broă lơh jơnau mblàng yal lơh lài tàm mpồl bơtiàn.

Jăt jơnau yal bơh Mpồl Jơi bơtiàn- Bơta pin dờn jăt yàng, Mpồl Tam klăc Cau ùr Dà lơgar Việt Nam, ală broă lơh bơh ală Mpồl lơh broă dê tàm ală xã lơh lài neh tơrgùm tàm tìp măt lơh kwèng mblàng yal jơnau lơh lài nàng tam gơl bơta mờng kơlôi, bơta mờng lơh, sang tĕ jơnau kơlôi sơnơng tam cah ờ rờm bal ùr klau. Jăt tàm bơta bơto pơlam bơh Dà lơgar dê, ală kâp mpồl neh hòi tơrgùm bơta mŭt lơh bal bơh ală gah, ală kâp dê lam lơh ală broă lơh lơh geh uă cồng nha.