Rlau 8 jiơ drim ngai 01/07 tàm Anih tờm drơng broă sră pơ àr gơnoar ătbồ dà lơgar sàh tiah nhàr lơgar Bờ Y, càr Quảng Ngãi neh geh 16 nă làng bol tus lơh sră nggal sră pơ àr gơnoar ătbồ, mìng là gah ù tiah lơm. Ồng Nguyễn Thanh Hùng, cau geh jàu drơng kơnòl Anih tờm drơng broă sră pơ àr gơnoar ătbồ dà lơgar dê, pà gĭt, sàh tiah nhàr lơgar Bờ Y geh gùng nhàr lơgar rềp 2 lơgar Lào mờ Campuchia. Sàh geh tơnggơs jăt tàm bơta tơmŭt bal mpồl lơh broă sră pơ àr gơnoar ătbồ ală sàh: Pờ Y, Đăk Xú mờ ƀòn drà dềt Plei Kần. Tơnơ̆ rơndăp tăp sèng, sàh geh bă ù ơnàng rlau 240 kơi sồ vuông, khà kờp làng bol rlau 35 rbô nă. Tiah lơh hìu duh broă lơh broă sàh tàm anih tờm sră pơ àr gơnoar ătbồ ƀòn drà dềt Plei Kần, kơnhoàl Ngọc Hồi, càr Kon Tum (lài do). Ồng Nguyễn Thanh Hùng, pà gĭt: “Anih tờm sră pơ àr gơnoar ătbồ dà lơgar geh Đảng ủy sàh jàu broă ai 9 nă kwang bàng mờ kông cưk in. Jơh ală kwang bàng bơh ală sàh Pờ Y, Đăk Xú mờ ƀòn drà dềt Plei Kần lài do rê drơng broă tàm Anih tờm drơng broă sră pơ àr gơnoar ătbồ dà lơgar sàh dê. Bol hi neh jàu ing tơl drơng kơnòl ală broă bè Phan kwơ geh is tiah ơm kis, Broă lơh sa sươn sre, Kă bro mờ lơh sa mờ măy mŏk, bơ̆t bơtàu, Niam chài mpồl bơtiàn mờ sền gàr adăt boh lam cau tàm hìu bơnhă. Ală oh mi do tơl lơh geh jơnau sồr drơng broă ai làng bol in".

Mùl màl pà gŏ ală tŭ dờp, bơsong sră nggal ai làng bol in, kwang bàng Anih tờm drơng broă sră pơ àr gơnoar ătbồ dà lơgar sàh Bờ Y pal lời uă tŭ jiơ nàng bơto pơlam, dong làng bol cih jơnau yal tài ală tam gơl bè nhàr ù tiah muh măt. Ờ dùl êt nă làng bol gam ờ hềt gĭt loh he gam ơm kis tàm sàh lơi càr Quảng Ngãi dê. Ồng Hoàng Hữu Sửu tus lơh sră nggal pơdờn ù tiah ai 2 nă kòn in, đơs nền, bơh chờm ồng kung gơlơh ờ kwèng ngan sơl. Mơya ồng mhar ngan lơh geh sră nggal kơnờm broă lơh bơsong, nùs nhơm lơh broă bơh kwang bàng bơsong sră nggal dê niam ngan: “Cau lơi kung geh bơta ờ kwèng lơm bơh sơnrờp là tài bơh dùl càr Kon Tum tŭ do là gơgơs càr Quảng Ngãi. Hơ̆ sồng bơh 3 kâp tŭ do gam 2 kâp. Drim do, sră nggal sră pơ àr gơnoar ătbồ den gŏ kung ƀươn ngan sơl. Oh mi tàm anih lơh broă lơh broă jơh nùs jơh tồr ngan, chờ hờp chờ hờn, wă rò bơto pơlam loh làng ngan”.

Nàng ƀươn ƀoài ai làng bol in, bal mờ yal tơnggĭt bè anih lơh broă bơh sàh pa bơh broă lơh mblàng yal, yal tơnggĭt tơn tus làng bol in mờ bơh internet mpồl bơtiàn, bơh ngai lơh broă bơh sơnrờp, Anih duh broă Làng bol ală sàh ndrờm ai kwang àng wă rò bơto pơlam làng bol tus bơsong broă tàm hìu duh broă pa.

Tơnơ̆ tơmŭt bal càr Kon Tum, càr Quảng Ngãi geh 9 sàh tiah nhàr lơgar rềp nhàr lơgar mờ Lào mờ Campuchia mờ gùng nhàr lơgar jòng rlau 292 kơi sồ. 9 sàh tiah nhàr lơgar càr Quảng Ngãi dê, geh: Bờ Y, Sa Loong, Dục Nông, Đăk Plô, Đăk Long, Rờ Kơi, Mô Rai, Ia Tơi mờ Ia Đal.