Tàm sơnah ƀòn Buôn Ma Thuột, geh lơh broă lơh tìp mat tàm tơrbŏ bal kă bro phan cau lơh sa kă bro càr Dăk Lăk mờ lơgar Lo nàng kờñ chồl tơnguh pràn rlau tai lơh broă bal kă bro phan lơh gơs bơh suơn sre đah Việt Nam mờ Lo, kuơmàng là tàm gah ròt ală gah lơh phan sầu riêng. Tàm pơrjum, ală cau ala mat neh cribơyai, mblàng lơh loh jơnau kờñ drà kă bro tac biap, plai chi, ngan là phan sầu riêng tàm lơgar Lo.

Nam 2024, khà sầu riêng bơh Việt Nam dê tac tus lơgar Lo geh 736 rbô tấn, gơguh uă rlau 2 dơ̆ pơndrờm mờ nam lài hơ̆. Jat ală mpồl lơh sa kă bro lơgar Lo yal, bơdìh mờ bơta ƀuơn bơh Jơnau kĭ hơ Lơh broă bal Lơh sa tơl làm kơnhoàl ù tiah, “Gùng tơlir” tiah nhàr đah Việt Nam mờ Lo dong geh mut lik mpồng nhàr lơgar dồ bă mhar, jơnau kờñ tac phan bơh làng bol dê gơguh uă den bơta ƀuơn bè tiah tam phan, bơta niam kơ̆ kơljap sùm mờ mpồl tac phan li la gùt nam neh pơgồp bơnah tàm bơta gơguh bơh gah lơh phan sầu riêng Việt Nam dê tàm lơgar Lo. Ală mpồl lơh broă, mpồl lơh sa kă bro Việt Nam kung tam pà bè broă rơndap lơh, drà kă bro sầu riêng. Ală cau ala mat kơp kờñ crơng gơs ală mpồl lơh bal lơh gơlik phan, gàr niam jơnau sồr tàm pơdar sùm bơh chờm tơn mờ bơta kơp kơnờm bè anih blơi phan kơ̆ kơljap jŏ jòng sùm, geh jơnau kờñ dut ndơl loh làng. Di dơ̆ do, ala mat ală mpồl neh kĭ sră cih kah lơh broă bal tàm broă tac mờ blơi phan lơh gơs bơh suơn sre mờ sầu riêng.