Tŭ do KOL, cau bơceh lơh tơngume, cau ătbồ broă ală mpồl tàm ală internet mpồl bơtiàn…tàm càr Lâm Đồng, gam lơh broă jơh nùs tàm uă broă bè lòt nhơl, phan sa, niam chài, kă bro phan lơh geh bơh sươn sre…mờ kờp jơh khà cau pờ sền gĭt nđờ jơ̆t tơlak dơ̆. Do là ală cau lơh gơnoar broă lơh gơrề uă, tề lam yal tơnggĭt jơnau tàm bơnàng jă sồ, lơh gơlik bơta gơrềng tơn tus broă lơh gàr niam lơngăp lơngai tàm anih internet tàm ƀòn lơgar. Pơrjum lời uă tŭ jiơ mblàng yal kơrnoăt boh lam bè lơngăp lơngai internet, sền gàr jơnau yal tơnggĭt să tờm, mơkung tàm tơrbŏ, lơh niam gơnoar broă KOL dê mờ cau ătbồ broă tàm lơh gơrề uă yal tơnggĭt jơnau niam, niam chài kòn bơnus. Dong ală cau ătbồ broă gĭt geh ală jơnau gĭt wă kơrnoăt boh lam kờñ pal geh, gàr niam broă lơh tơngume, ătbồ pang, gah, mpồl di jơnau sồr kơrnoăt boh lam dê.

Dơ̆ do, Kwang àng càr Lâm Đồng tơlik măt broă lơh tơrlòng “Anih sồ Lâm Đồng niam lơngăp lơngai, song niam” là anih cribơyai sồ tàm tơrbŏ mpồl bơtiàn KOL, cau ătbồ broă mờ mpồl kwang àng, ală anih lơh broă ătbồ dà lơgar mờ mpồl lơh sa kă bro, kơlôi tus bơta bơtàu tơngguh càr Lâm Đồng dê tàm rài sồ.