Do là ù tiah kah yau gơ jat bal mờ Củ tịc Hồ Chí Minh mờ Dà lơgar tàm tơngai tam lơh tơng klàs jơi bơtiàn, tiah gơlik geh Pơrjum dờng làng bol Dà lơgar ngai 16/8/1945 – bơnàng jă tơng gơs Quôk hội Việt Nam.

Đơs tàm broă lơh, Củ tịc Quôk hội jờng rơ uă ngan bơta lơh ngan bơh Tuyên Quang dê tàm broă sền gàr, ngui niam bơhiàn kăc màng, mơkung đơs sùm gơnoar bơh tiah do dê tàm broă bơto bơtê bơhiàn ờs mờng ai rơnàng kơnòm să in. Ồng sồr càr lam lơh geh cồng nha ală jơnau sồr bơh Tổng Ƀí thư ồng Tô Lâm dê, mơkung lơh jat niam ală adat, Jơnau lơh nền tàm pơrjum Quôk hội pa ai lơh jat. Củ tịc Quôk hội đơs nền, Quôk hội rơ̆p pơgồp bal mờ Tuyên Quang tàm broă lơh niam wơl tiah tềl lời wơl, bơyai lơh ală broă lơh lòt sền, pơgồp bơnah lơh gơrề uă bơta kwơ kah yau Tân Trào tus mờ mpồl bơtiàn.