Bơh bơta đơng lam bơh ồng Trần Thanh Mẫn, Chủ tịch Quốc hội, ngai 27/7, Anih duh broă Lơh kơnòl broă sùm Quốc hội pơn jat tai dar pơrjum dơ̆ 4, tă pơgồp jơnau đơs bè rơndăp broă lơh Jơnau lơh nền tàm pơrjum bơh Quốc hội dê bè broă lơh rcang lài kơryan cau lơh tìs mờ lơh tìs adat boh lam, broă lơh bơh Viện kiểm sát làng bol, bơh Anih cah rơña làng bol mờ Jơnau lơh nền bơh Anih cah rơña dê ...

Kung tàm dar pơrjum, Anih duh broă Lơh kơnòl broă sùm Quốc hội tă pơgồp jơnau đơs gơwèt mờ Sră yal bơh Chính phủ dê bè jơnau rcang cih Jơnau lơh nền bơh Chính phủ dê cih broă lơh, broă dong kờl krơi is gơwèt mờ rơndăp broă lơh bơt bơtàu tiah drà gơrề tus dà lềng tàm ƀòn dờng Đà Nẵng. Jat hơ̆, rơndăp broă lơh mờ bă ù ơnàng pơgăp 1 rơbô 500 lồ, priă bơcri lơh rlau 400 rơbô tơmàn đong, geh pơlam gùng dà bơtàu tơnguh gơs tiah drà gơrề tus dà lềng pa ngan, geh gơnoar broă ală lơgar, tiah tơrgùm bồ tơngoh jak, măi mok mờ bơceh lơh. Pơgồp bơnah pờ ơnàng ù tiah bơtàu tơnguh, lơh geh bơta gơn kơnờm gơguh tai pa bơh rài lơh sa bồ tơngoh gĭt wă, di pal mờ jơnau sồr tam gơl sồ broă lơh bơtàu tơnguh dà lơgar tàm rài pa dê.