Rơndăp broă lơh ai kơ̆ kơl jăp tiah làng bol ơm kis tiah trồ tiah lơh aniai tàm sàh Ia Tul kờp jơh bơcri priă lơh rlau 200 tơmàn đong, bơh Mpồl atbồ ală rơndăp broă lơh bơcri priă bơt bơtàu càr Gia Lai dờp cau tờm bơcri lơh. Rơndăp broă lơh ơnàng mờr 22 lồ, geh bơcri priă lơh ring bal phan bơna măi mok mờ ală gùng lòt rê tàm dơlam is, rbòng dà, ồs đèng, sòl àng năng lượng mat tơngai mờ dà ngui sa pah ngai bơh 3 nơm tơr lung dà.

Ồng Phạm Văn Đức, Chủ tịch Anih duh broă Làng bol sàh Ia Tul, càr Gia Lai pà gĭt, rơndăp broă lơh nàng kờñ ntrờn mhar 207 hìu bơnhă làng bol tàm Bôn Jứ, tiah uă nam do sùm kong mờ bơta pơhìn tơrlah ù, ngơr dà, pơhìn tus màng kis mờ phan bơna bơh làng bol dê pah dơ̆ mìu dờng dà tih dà lìu gơlik geh.