Di dơ̆ tơngkah kir sơnrai 79 nam Ngai Cau ling sồt să - Cau chơ̆t màng, mho ngai 26/7, tàm ƀòn dờng Hồ Chí Minh, ồng Trần Thanh Mẫn, Chủ tịch Quốc hội neh tus pơdơng bơkào, chu ñàng tàm Rùp mòn ƀồc ồng Trần Phú, Tổng Bí thư lài do, Hìu Tơrñăng kah kơlôi ală Cau ling khin cha jak chài chơ̆t màng, Hìu sền gàr ală ƀồc ntìng cau ling chơ̆t màng, tiah duh khoai Cau ling khin cha jak chài chơ̆t màng Lê Thị Riêng mờ Cau ling khin cha jak chài chơ̆t màng Trần Văn Kiểu; mơkung lùp còp, pơndờm pơnđiang ală mpồl tus bal lòt jòi, tơrgùm wơl ƀồc ntìng cau ling chơ̆t màng tàm Suơn bal Lê Thị Riêng.

Tàm nùs nhơm yŭ rơyùm mờ ngoh rơngăc, ồng Trần Thanh Mẫn, Chủ tịch Quốc hội mờ Mpồl lơh broă neh jơh nùs chu ñàng ƀô thồm, tơngŏ nùs nhơm gĭt ưn ngài uă ngan kah kơlôi ƀồc ồng Trần Phú, Tổng Bí thư lài do mờ ală Cau ling khin cha jak chài chơ̆t màng neh khin cha tam lơh, chơ̆t phi să tài lơngăp lơngai is, khat gơboh mờ tơl làm kơnhoàl ù tiah bơh Dà lơgar tờm dê, tài bơta chờ hờp bơh làng bol dê. Nàng kờñ pơndờm pơnđiang ală mpồl gam lơh kơnòl broă lòt jòi, tơrgùm wơl ƀồc ntìng cau ling chơ̆t màng mờ đal gĭt mat ƀồc ntìng cau ling chơ̆t màng tàm Suơn bal Lê Thị Riêng, ồng Trần Thanh Mẫn- Chủ tịch Quốc hội; ồng Trần Cẩm Tú, Duh broă sùm Mpồl đơng lam Đảng Dà lơgar (Ban Bí thư), mò Bùi Thị Minh Hoài, Chủ tịch Anih duh broă Mặt trận Dà lơgar Việt Nam neh jàu pà ală bơnah phan pà geh kwơ ai ală mpồl gam lơh kơnòl broă tàm tiah do in.