Jăt jơnau ai gơnoar bơh Kụk Gah rơndeh par Việt Nam dê, dơ̆ par sền swì, sền swì bơta dipal geh lơh bơh ngai 23/7 tus jơh ngai 28/7 nàng kờñ sền swì tơl làm bơta niam ală măy mŏk phan ngui lam gùng mờ đèng yal tơngĭt gah rơndeh par pa geh bơcri priă, lơh tam gơl wơl. Tơnơ̆ tŭ lơh sir rơndăp broă lơh lơh ơnàng wơl, Ƀlàng rơndeh par Liên Khương neh pơgồp bal mờ ală gah rơndeh par bơ̆t bơtàu broă rơndăp lơh pờ wơl gùng par bơh ngai 19/8.

Digơlan, ƀlàng rơndeh par rơ̆p ai par kờp bal bơh 36 tus 40 dơ̆ par lòt mờ par rê pah ngai, tàm tơrbŏ mờ ƀòn dờng Hồ Chí Minh, Hà Nội, Đà Nẵng, Vinh, Cần Thơ mờ Hải Phòng. Gùng par ală lơgar Dà Làc – Kuala Lumpur (lơgar Malaysia) kung digơlan geh ai par wơl bal mờ khà 8 dơ̆ par lòt mờ par rê pah poh. Is tàm ngai sơnrờp ai par wơl, Ƀlàng rơndeh par ală lơgar Liên Khương digơlan drơng pơgăp 28 dơ̆ par lòt mờ rê in.