Pah àng drim, cau ling yau ồng Hán Vinh Hà, ơm tàm thôn Sơ Trà, sàh Krông Ana, càr Dăk Lăk wơl geh mat tàm tiah krơm tăp bơh gờñ ngan. Lòt sền jơh tơl phan ơn tăp, ồng pơndiang pơ ùr lòt tàm drà den hơ̆ sồng lòt còp ƀlàng kòi. Ală broă lơh mờng kwèng tàm uă nam neh dong ồng geh phan bơna hìu dờng niam. 5 lồ kòi, 3 lồ tờm chi sa plai bal mờ anih lơh gơlik phan lơh geh bơh broă lơh sa suơn sre mờ dùl suơn ròng ada deh tăp, cèng wơl ai cau ling yau in priă lơh geh gĭt nđờ tơmàn đong pah nam. Ồng Hán Vinh Hà yal, nàng lòt tus tơngai tŭ do, ồng neh lòt gan uă dơ̆ lơh broă ờ geh cồng nha tài bơh trồ tiah lơh aniai mờ kòp bơtờp. Bơta dong ồng ờ lời tĕ, jat ồng, ngan là bơta lơh nền bơh nùs nhơm mờ bồ tơngoh geh pơlam tàp tàm mpồl ling dê.

“Bơta gơn kơnờm là he pal ờ bài kong bòl glar, ờ bài kong rƀah, he pal brồ guh. He bơsram geh bơh tŭ tàm mpồl ling là nùs nhơm lơh nền, nùs nhơm pơnđơl pràn lơh ngan bơh he dê nàng he in lơh jài, tă pơgồp jài ai hìu bơnhă, ai mpồl bơtiàn in”.

Kung bè cau ling cau ồng Hán Vinh Hà, uă cau tàm mpồl cau ling yau tàm sàh Krông Ana kung cèng nùs nhơm cau ling yau mut tàm rài kis bè ờs. Cau bơt bơtàu suơn dờng, cau pờ anih lơh sa kă bro. Tŭ rài kis neh kơ̆ kơl jăp, khi wơl pơn jat tai dong kờl cau ling bal mờ làng bol brồ guh bal.

Cau ling yau Hoàng Văn Cư, ơm tàm ƀòn Trấp, tŭ do bơt bơtàu geh anih lơh sa kă bro phan bơna broă lơh sa suơn sre mờ blơi phan lơh geh bơh broă lơh sa suơn sre kơ̆ kơl jăp. Tŭ lơh sa hìu bơnhă bơtàu tơnguh đau, ồng wơl lòt bal mờ làng bol mờ cau tàm mpồl Cau ling yau kal ke. Pah nam, 2 anih kă bro phan bơh ồng dê dong kờl uă ngan cau lơh broă sa blơi phơng sih tơm priă lơyài, ờ kờp priă cồng. Ồng kung sùm dong kờl ală cau geh rài kis kal ke, lùp còp pơndờm pơnđiang cau tàm mpồl cau ling bal kòp tê jê să, kra ờ sô ờ soàn. Cau ling sồt să ồng Lê Đắc Đạm, ơm tàm ƀòn Trấp, sàh Krông Ana yal bè broă lơh bơh ồng Hoàng Văn Cư dê:

“Tàm thôn gam uă cau ling yau kung gam kal ke uă ngan, ờ geh priă blơi phơng sih den geh ồng Cư dong kờl ai giă tăc dong kờl, ờ ai priă cồng. Tàm ală srơh, pơn yơu bè pah nam là cau ling yau bơyai lơh ngai bơhiàn ờs mờng bơh Chi hội dê, ală broă lơh tàp pràn să jan là ồng Cư dong kờl jơh”.

Jat ồng Hoàng Văn Cư, ală nam nhai tàm mpồl ling ờ mìng pơlam tàp nùs nhơm lơh sa lơm mờ gam tơngkah tơl nă cau ling in pal kis geh kơnòl mờ mpồl bơtiàn, bal mờ tŭ rài tam lơh neh lòt ngài rao.

“Tŭ cơnđoà jơng mut tàm tiah mpồl ling, bol añ geh pơlam tàp bè broă lơh să jan, rài kis mờ nùs nhơm drơng broă. Tam lơh halà rài ring lơngai kung bè hơ̆ sơl, cau ling pal kis lơh krơh niam nàng oh kòn kòn sau in lơh jat bal. Tus bal Mpồl Cau ling yau den pal pơndờm pơnđiang oh mi sền gàr pràn kơl dang să jan, jơh nùs tus bal pơrjum mờ bal mờ gơ̆p tă pơgồp ai ƀòn lơgar in”.

Mpồl Cau ling yau sàh Krông Ana tŭ do geh mờr 1 rơbô nă cau tàm mpồl. Bơh nam 2025, Mpồl ờ gam geh cau tàm mpồl gơwèt mpồl hìu bơnhă rƀah tai, mờr dùl bơnah pe cau tàm mpồl geh rài kis pas gơs đau. Ồng Đỗ Xuân Đản, Chủ tịch Mpồl Cau ling yau sàh Krông Ana đơs là, cồng nha hơ̆ geh bơh broă ai tơngume bơsram mờ lơh jat jơnau sồr Wa Hồ dê tàm ală srơh geh ngan bè dong bal mờ gơ̆p bơtàu tơnguh lơh sa, tơrmù rƀah, bơt bơtàu ƀòn lơgar pa mờ sền gròi ai cau tàm mpồl in. Ală srơh ờ mìng pơgồp bơnah lơh gơrề uă nùs nhơm Jơnau sồr sồ 05 bơh Bộ Chính trị dê lơm mờ gam tơngŏ gơnoar, kơnòl bơh Cau ling yau dê tàm rài ring lơngai, lơh gơrề uă rùp hin niam bơnĕ bè “Cau ling Wa Hồ” pơgồp bơnah tam gơl muh mat ƀòn lơgar dê.

 “Ală kwang bàng, cau tàm mpồl Cau ling yau sàh Krông Ana neh jơh nùs bơsong kal ke nàng brồ guh tàm rài kis, tŭ lik bơh mpồl ling kung neh sền gàr mờ ngui niam bơhiàn cau ling Wa Hồ, hơ̆ là mpờl gŏ ngan tàm ală srơh bơt bơtàu ƀòn lơgar pa bè pà ù, lơh gùng, hòi jà dong kờl kòn bơnus, nùs nhơm niam dong kờl is, jơh nùs sơlơ tơnguh tai ală srơh tàm ƀòn lơgar in bơtàu tơnguh.”

Rài tam lơh neh lòt ngài, ală ƀlàng sre mờ suơn dờng tŭ do neh ala ai rbòng gàr tam lơh nam lài do dê. Tiah ală cau ling nam lài do kung krơi ngan sơl, mơya nùs nhơm sơr lèt gan kal ke, nùs nhơm geh kơnòl mờ bơta tam pà bal kung gam bè ờs. Hơ̆ kung là broă mờ ală cau ling yau tàm sàh Krông Ana dê pơn jat tai bơsram mờ lơh jat Wa Hồ mờ ală broă lơh ƀarah ƀarài pah ngai dê.