Anih duh broă Làng bol càr Dăk Lăk sồr broă rơndăp tăp sèng mpồl hìu bơsram pal wèt tus broă tơrmù gam di pơgăp 50% mpồl hìu bơsram, uă rơlao mờ khà ờ uă ngan Dà lơgar geh ai. Do là tơngu me tờm geh đơs uă tàm dơ̆ pơrjum mờ ală sờh, gah lơh broă mờ 102 sàh, sơnah ƀòn bè gùng dà broă lơh rơndăp tăp sèng hìu bơsram, tŭ càr Dăk Lăk là dùl tàm 15 càr geh Dà lơgar rơwah tơrlòng lơh.

Tŭ do gùt càr geh 1 rơbô 238 hìu bơsram dà lơgar lơh. Gùng dà broă lơh bơh ală tiah dê dan tơrgùm gam 462 hìu bơsram, tàm tŭ Sờh Bơto bơtê mờ Bơsram sồr tơrmù gam 690 hìu bơsram, mờ lơh geh tai uă hìu bơsram bàr kấp. Ồng Nguyễn Thiên Văn, Phó Chủ tịch Anih duh broă Làng bol càr Dăk Lăk sồr broă rơndăp tăp sèng pal geh lơh di pal, gơdờp mờ bơta geh bơh tơl tiah dê, mìng tơrmù broă atbồ, ờ tam gơl anih bơsram sră kơnòm bơsram dê.

Anih duh broă Làng bol càr Khánh Hoà pa ring bal rơndăp broă lơh rơndăp tăp sèng broă lơh anih bơto bơtê dà lơgar, rcang ai nam bơsram pa 2026-2027. Jat jơnau rcang cih, gùt càr rơ̆p tơrmù 248 hìu bơsram dà lơgar, drờm mờ  34% khà hìu bơsram gam geh tŭ do, lơh geh jơnau sồr tơrmù uă ngan rlau jơh 30% jat jơnau sồr bơh Chính phủ dê. Tŭ do, càr Khánh Hoà geh 728 hìu bơsram dà lơgar mờ rlau 26 rơbô 500 nă kwang bàng atbồ, cau pơgru mờ cau lơh broă. Tơnơ̆ rơndăp tăp sèng, ală tiah hìu bơsram mờ hìu bơsram tiah ndai kung gàm gàr broă lơh bơto bơtê mờ bơsram, gàr niam hìu bơsram phan bơna drơng broă kơnòm bơsram, mìng is ală hìu bơsram jơi bơtiàn dồ ết nă cau ơm sa bĭc tơn mờ hìu bơsram is ồn ờ hềt geh rơndăp tăp sèng. Gơwèt mờ kwang bàng jờng kah, càr rơ̆p sền sơwì ntrờn tus ală mpồl lơh broă di pal halà rơndăp bơto bơtê wơl; ală cau geh bơta kơ̆p kờñ rơ̆p geh bơsong ơm rlô jat jơnau sồr dê.