Wèt tus tơngkah kir sơnrai 79 nam Ngai Cau ling sồt să- Cau ling chơ̆t màng (27/7), drim ngai 23/7, tàm Hà Nội, Ƀộ Broă dơlam is đơng lam, pơgồp bal mờ ală anih lơh broă geh gơrềng yŭ rơyùm bơyai lơh Pơrjum jờng rơ cau geh màng mờ dà lơgar gùt lơgar nam 2026. Rlau 300 nă cau ala mat geh màng mờ dà lơgar pơn rơ jak ngan ala mat ai gĭt nđờ tơlak nă cau ling sồt să, cau ling kòp tê jê să, cau pròc mhàm cau ling chơ̆t màng mờ cau geh màng mờ dà lơgar tàm gùt kơnhoàl ù tiah Dà lơgar dê tus bal mờ pơrjum.

Do là ală krơh niam àng sơrdah ngan bè bơta pràn brồ guh, pơn jat tai tă pơgồp jơh nùs ai broă lơh bơt bơtàu, bơtàu tơnguh dà lơgar mờ sền gàr Dà lơgar tờm tàm tơngai pa. Pơrjum là dơ̆ jrô ơnàng uă nàng Đảng, Dà lơgar mờ Làng bol tơngŏ nùs nhơm gĭt ưn ngài ờ gĭt lơh gơwèt mờ ală tă pơgồp, phi să dờng màng bơh ală cau ling khin cha jak chài- cau ling chơ̆t màng, cau ling kòp tê jê să dê. Bơh hơ̆ tơngŏ nùs nhơm lơh ngan pơn jat tai lơh jat geh cồng nha ală broă lơh kis gĭt jơnau gĭt adat gơwèt mờ hìu bơnhă dờp bơta dong kờl mpồl bơtiàn dê.