Anih duh broă Làng bol càr Dăk Lăk pa pơgồp bal mờ Kụk Kảñ sát Atbồ sră pơ àr gơnoar atbồ bè rơndăp tăp sèng mpồl bơtiàn (Bộ Kwang àng), Kwang àng càr mờ Kông ty GeneViet bơyai lơh broă lơh tơrgùm dờp mẫu ADN bơh cau pròc mhàm cau ling chơ̆t màng ờ hềt gĭt mat. Do ờ mìng là broă lơh kah ưn ngài di dơ̆ tơngkah kir sơnrai 27/7 lơm mờ gam là broă lam lơh ngan ngồn “Broă lơh dờng 500 ngai mang lơh pràn lòt jòi, tơrgùm wơl mờ sền gĭt mat ƀồc ntìng cau ling chơ̆t màng” gam geh lam lơh tàm làm gùt lơgar.

Jat tơrgùm kờp, gùt càr Dăk Lăk tŭ do geh 15 rơbô 222 bơtô ƀồc ntìng cau ling chơ̆t màng. Tàm hơ̆, ală anih lơh broă geh gơnoar neh lòt sền, tơrgùm wơl jơnau yal bơh 10 rơbô 235 cau ling chơ̆t màng; pa geh 5 rơbô 911 ƀồc ntìng gĭt mat, gam wơl 4 rơbô 324 ƀồc ntìng cau ling chơ̆t màng ờ hềt gĭt mat. Pal sền gròi ngan là, geh 2 rơbô 706 ƀồc ntìng cau ling chơ̆t màng kung gam cau pròc mhàm tơl ală bơta nàng tơrgùm dờp mẫu ADN, mờ kờp jơh khà 3 rơbô 865 nă cau. Dơ̆ lam lơh do ai jơnau kờñ tơrgùm dờp rlau 70% khà mẫu tơl ală bơta nàng lơh ală jơnau yal tơngĭt ADN dà lơgar, drơng broă tàm pơn drờm, sền gĭt mat ƀồc ntìng cau ling chơ̆t màng tàm tơngai tus dê.

Nàng sền gĭt broă tơrgùm dờp geh bơyai lơh ring bal, di mờ jơnau sồr mờ gàr niam bơta di ngan, Kwang àng càr Dăk Lăk neh lơh 12 tiah tơrgùm dờp mẫu tàm gùt càr, hòi jà mpồl cau bơh kấp càr tus kấp sàh tus bơto pơlam, dong kờl tơn làng bol in lơh sră nggal, sền gĭt jơnau yal tơngĭt mờ ai mẫu sinh phẩm. Đại tá ồng Võ Hùng Tường, lam bồ Cơldŭ Kảñ sát Atbồ sră pơ àr gơnoar atbồ bè rơndăp tăp sèng mpồl bơtiàn, Kwang àng càr Dăk Lăk, pà gĭt:

"Bol añ pơgồp bal  niam mờ ală mpồl lơh broă ờs mờng bơh Kụk Atbồ sră pơ àr gơnoar atbồ, ai mpồl cau lơh broă tàm 12 tiah tơrgùm mẫu mờ dơ̆ lĕ bal bơyai lơh tơrgùm bơh ngai 23 tus ngai 26/7/2026. Tơl mpồl ndrờm geh mpồl cau drơng broă tàm tŭ tơrgùm dờp kung bè sền gĭt di ngan jơnau yal bơh cau pròc mhàm dê nàng gàr niam broă tơrgùm mẫu di pal ngan”.

Geh mat tàm tiah tơrgùm dờp mẫu tàm sơnah ƀòn Ea Kao, mò H'Blak Niê cèng bal bơta pin dờn kơ̆p kờñ ngan bơh jơh hìu bơnhă dê. Kồñ tờm bơh mò dê là cau ling chơ̆t màng mơya uă nam do ờ hềt gĭt mpồl ling tam lơh, tiah chơ̆t phi să halà bơtô ƀồc. Gơwèt mờ hìu bơnhă mò dê, broă ai mẫu ADN ờ mìng ƀuơn ngan là dùl sră pơ àr gơnoar atbồ lơm mờ gam là tŭ tơngai niam nàng tàm tơrbŏ wơl dùl dang che cau pròc mhàm bal neh tăc tài bơh tam lơh dê.

"Đảng mờ Dà lơgar ai mẫu ADN nàng jòi cau pròc mhàm cau ling chơ̆t màng, hìu bơnhă chờ hờp ngan, lơh geh bơta bơta kơ̆p kơnờm nàng bol añ in gơtùi jòi gŏ kồñ he dê”.

Bơta is ồn bơh broă lơh dơ̆ do dê là ờ mìng ơm tàm măi mok pa ngan lơm mờ gam ơm tàm gơtha nùs nhơm niam uă ngan. Tơl mẫu ADN geh ơn prăp wơl tŭ do digơlan ờ hềt geh cồng nha mơ tơn, mơya rơ̆p gơ gơs dùl bơta kwơ màng tàm ală jơnau yal dà lơgar, crăp rcang tam pơndrờm tŭ geh tai jơnau yal bè ƀồc ntìng cau ling chơ̆t màng geh tơrgùm wơl. Hơ̆ kung là broă nàng jak chài  lòt bal mờ nùs nhơm “Hùc dà kah tô dà”, dong gùng lòt kah ưn ngài ờ ơm wơl tàm ală bơhiàn kah kơlôi lơm mờ pơn jat tai mờ ală broă lơh ngan ngồn. Tài bơh tơnơ̆ rlau 50 nam ring lơngai, bơta mờ uă hìu bơnhă kơ̆p gơn ngan rlau jơh kung gam là dùl ngai cau pròc mhàm he dê geh hòi di mat, geh rê wơl mờ ƀòn lơgar tờm. Mờ tơl mẫu ADN geh tơrgùm dờp ngan là bơta kơ̆p kơnờm nàng ală dơ̆ bơtòm tơrgùm bal tơnơ̆ rài tam lơh gờñ gơ gơs bơta geh ngan.