Tàm dơ̆ tìp, ồng Lê Hoài Trung, Ƀộ trưởng Ƀộ Cribơyai broă mờ lơgar ndai lơgar Việt Nam he dê đơs sùm Việt Nam sền lơgar Mỹ là dùl tàm ală cau lơh broă bal kwơmàng khà dùl, kơ̆p kờñ bal mờ lơgar Mỹ pơn jăt tai ai gĭt gơ̆p 2 lơgar lòt mŭt tàm broă lơh ngan ngồn, geh cồng nha, mùl màl mờ tơl làm, dipal mờ bơta kwơ bơh làng bol bàr lơgar dê, tă pơgồp jơh nùs ai ring lơngai, kơ̆ kơl jăp, lơh broă bal mờ bơtàu tơngguh tàm kơnhoàl ù tiah do mờ tàm dunia in. Tàm dơ̆ tìp, bàr đah dồ nùs bal pơn jăt tai lơh broă bal bơsong jơnau gơlời wơl rài tam lơh, bơsong ƀơ̆ ƀơl dioxin, jòi rờ ƀồm mền, dong kờl cau kwĕt kơlte, jòi cau ling lơgar Mỹ roh thĭt tàm rài tam lơh, kung bè lòt jòi, rờ tơrgùm mờ đal gĭt nền muh măt ƀồc ntìng cau ling chơ̆t màng Việt Nam dê.

Ồng Lê Hoài Trung, Ƀộ trưởng Ƀộ Cribơyai broă mờ lơgar ndai lơgar Việt Nam dê yal bè ală lơh ngan bơh Đảng mờ Chính phủ Việt Nam dê tàm broă lơh pràn lơh jăt lòt jòi, rờ tơrgùm mờ đal gĭt nền muh măt ƀồc ntìng cau chơ̆t màng Việt Nam dê, mơkung đơs niam ngan, bơta tă pơgồp kwơmàng bè sră nggal, jơnau yal mờ sră lời kir, măy mŏk sền swì gĭt nền ADN bơh đah lơgar Mỹ mờ sồr đah lơgar Mỹ pơn jăt tai lơh, sơlơ lơh broă bal tai mờ lời bơnah priă dipal ai broă lơh do in.