Săp ntas cing mồng mpong tàm gùl hìu mpồl bơtiàn ƀòn Puăn, sàh Ea Phê, càr Dăk Lăk bơnĕ bơnài bal mờ ală gùng tam ya xoang hô hơng yal tơngĭt dùl kàl lơh chờ mờr tus rềp. Tàm bơr lŭ bal mờ ală ngai ờ ru ngan sơng ka sền gàr suơn chi rcang mut tàm kàl tơnhào, ală cau chài mờ mpồl đơs crih tam ya bơh ƀòn dê gơ jal pơlam tàp nàng pơgồp bơnah geh mat bal tàm Dơ̆ lơh chờ Sầu riêng càr Dăk Lăk mờr tus. Gơwèt mờ làng bol tiah do, dơ̆ lơh chờ ờ mìng là ngai chờ bơh plai Sầu riêng dê lơm mờ gam là dơ̆ yal tơngĭt bơhiàn niam chài is Tây Nguyên tus mờ gơ̆p bơyô rềp ngài. Ồng Y Cư Ayun, làng bol ơm tàm ƀòn Puăn pà gĭt, dơ̆ lơh chờ gam tus rềp den tàng tơl nă cau pơlam tàp tơryang tơryồng ngan. “Geh dơ̆ lơh chờ Sầu riêng mờr tus den mpồl dròng cing mồng ƀòn Puăn lơh ngan jơh nùs tus bal dròng cing mờ tam ya xoang ai gơ in niam ngan. An kơ̆p kờñ dơ̆ lơh chờ Sầu riêng nàng làng bol he in bơtàu tơnguh lơh sa, tam sầu riêng, kơ̆p kờñ sầu riêng geh giă rlau ai gơ in kơ̆ kơl jăp rài kis làng bol”.

Là tiah tờm mờ pơgăp 850 lồ sầu riêng, sàh Ea Phê sền dơ̆ Lơh chờ Sầu riêng ờ mìng là dơ̆ nàng yal tơngĭt uă phan lơh geh bơh broă lơh sa suơn sre lơm mờ gam là tŭ tơngai niam yal tơngĭt bơhiàn niam chài is bơh 23 jơi bơtiàn gam ơm kis tàm ù tiah do dê. Tơnơ̆ cồng nha bơh Ngai chờ Niam chài ală jơi bơtiàn bồ nam do gơ hòi gơ jà rlau 25 rơbô dơ̆ cau, tiah do gam pơn jat tai rcang ală broă lơh niam chài, phan sa, ràng tơlik phan bơna OCOP mờ bơtàu tơnguh lòt nhơl mpồl bơtiàn pơgồp bal mờ prap gàr niam chài. Jat mò Nguyễn Thị Kim Oanh, Chủ tịch Anih duh broă Làng bol sàh Ea Phê, bơta bơh sàh dê tàm dơ̆ lơh chờ rơ̆p là ală broă lơh yal tơngĭt niam chài kòn cau Bru - Vân Kiều, pơgồp bal mờ pơlam gùng dà bơtàu tơnguh lòt nhơl mpồl bơtiàn. “Lơh jat Dơ̆ lơh chờ Sầu riêng dơ̆ 1 nam 2026 bơh càr Dăk Lăk dê, sàh Ea Phê kung neh lơh broă rơndăp lơh bơyai lơh ală broă lơh phan sa, ràng tơlik phan bơna OCOP mờ ràng tơlik bàr pe broă bơh kòn cau Bru - Vân Kiều. Bơta pa bơh sàh dê là rơ̆p lam lơh gơl gùng mờ lơh tus tàm rài tơnơ̆ do den rơ̆p lơh niam lòt nhơl mpồl bơtiàn gơwèt mờ làng bol kòn cau Bru-Vân Kiều”.

Tàm sàh Krông Pắc, tiah bơyai lơh ală dar tàm pơr lòng giă sầu riêng tàm tơngume dơ̆ lơh chờ, broă lơh rcang lài kung geh lơh mhar. Bơdìh mờ broă lơh tàm pơrlòng giă bơh càr dê, sàh gam bơyai lơh tai 5 broă lơh lơh jat bơh gùl nhai 8 tus bồ nhai 9. Ồng Lại Đức Đại, Chủ tịch Anih duh broă Làng bol sàh Krông Pắc pà gĭt, broă lơh tàm pơrlòng giă geh kơ̆p kơnờm lơh geh tai gah tàm tơrbŏ bal đah cau tam sầu riêng, mpồl lơh sa kă bro blơi phan mờ tăc phan mờ lơgar ndai, mơkung pơgồp bơnah bơt bơtàu mat kă bro sầu riêng Dăk Lăk jat ală bơta kwơ. “Sàh bol añ kơ̆p gơn uă ngan tàm broă lơh tăc tàm pơrlòng giă phan bơna suơn sầu riêng, do là dùl tŭ tơngai niam pờ geh dùl broă lơh nàng tus rềp mờ gah broă do jat ală broă lơh tam phan kung bè là tŭ tơngai niam nàng yal tơngĭt uă mat kă bro sầu riêng Krông Pắc đơs is mờ sầu riêng càr Dăk Lăk đơs bal”.

Dơ̆ lơh chờ Sầu riêng càr Dăk Lăk dơ̆ 1 rơ̆p geh bơyai lơh bơh ngau 15/8 tus ngai 2/9 mờ ală broă lơh niam chài, lòt nhơl, gơ hòi gơ jà kă bro phan mờ tàm tơrbŏ bal tăc bro phan lơh geh bơh broă lơh sa suơn sre. Do là dơ̆ sơn rờp geh bơyai lơh dờng kấp càr, lơh tềl broă lơh tam gơl bơh dùl broă lơh ƀòn lơgar dê gơ gơs dơ̆ lơh chờ bơh gah phan tờm. Ồng Trần Hồng Tiến, Kwang Lam bồ Sờh Niam chài, Tàp pràn să jan mờ Lòt nhơl càr Dăk Lăk kơ̆p gơn. “Bol añ kơ̆p gơn tàm dơ̆ lơh chờ dơ̆ do rơ̆p wă pơgăp rlau 300 rơbô dơ̆ năc lòt nhơl tus mờ càr Dăk Lăk, bơdìh mờ hơ̆ den rơ̆p dong tơnguh uă mat kă bro sầu riêng Dăk Lăk tus mờ drà kă bro tàm lơgar mờ bơdìh lơgar, lơh geh mat kă bro is. Rơ̆p geh uă broă lơh đah bơdìh nàng yal tơngĭt uă, yal tơngĭt rùp hin niam chài, kòn bơnus càr Dăk Lăk dê, lơh geh bơta gơ hòi gơ jà, bơta tờm nàng gơ hòi gơ jà năc lòt nhơl, lơh gơrề uă bơta kwơ sầu riêng Dăk Lăk tus mờ jơh gùt lơgar mờ ală dà lơgar tàm dunia”.

Dăk Lăk tŭ do geh mờr 45 rơbô lồ sầu riêng, geh tus rlau 20% bă ù sầu riêng gùt lơgar dê. Nam 2025, priă lơh geh bơh tăc phan mờ lơgar ndai lơh geh pơgăp 1 tơmàn 100 tơlak dolar Mỹ, ai sầu riêng gơ gơs dùl tàm ală gah phan tờm bơh càr dê. Mơya bơh ngkời ală khà hơ̆ là broă lơh bơh gĭt nđờ jơ̆t rơbô hìu bơnhă làng bol dê, là bơta tam gơl bơh uă ƀòn lơgar mờ bơta pràn nàng sền gàr ală bơta kwơ niam chài ờs mờng.

Dơ̆ lơh chờ Sầu riêng càr Dăk Lăk dơ̆ 1 bơh hơ̆ mờ cèng uă gơtha rlau dùl broă lơh yal tơnggĭt uă phan lơh geh bơh broă lơh sa suơn sre. Hơ̆ là dơ̆ nàng tàm tơrbŏ bal lơh gơlik mờ drà kă bro, pơgồp bal bơtàu tơnguh lòt nhơl mờ prap gàr niam chài, hời rơ hời bơt bơtàu rùp hin càr Dăk Lăk là tiah tus bơh ală kàl plai lơngồt mờ ù tiah niam chài cing mồng niam ngan. Tŭ ală gùng tam ya xoang mpong tàm kàl sầu riêng dum kung là tŭ ù tiah Tây Nguyên pơyoa tus mờ ală bơyô tàm lơgar mờ ală lơgar  jơnau yal bè ƀòn lơgar gĭt lơh niam bơta ƀươn broă lơh sa suơn sre, sền gàr bơhiàn niam chài is mờ wèt tus bơtàu tơnguh kơ̆ kơl jăp.