Trồ klo ngai prang duh tàm ƀòn Bu Bong, sàh Đức An, càr Lâm Đồng, sap cah ơyun ntas kềng kơlik hìu, mò Thị Hel ròng sau jài, pờ jài điện thoại iat jơnau đơs dà kòn cau M’nông bơh Anih jơnau đơs Việt Nam dê. Gơ wèt mờ mò, ală jơnau đơs dà kòn cau M’nông rềp mềr, mờng kwèng gơ ya ngan ngồn ngan gơ wèt mờ hìu bơnhă: “Añ mờng ngan iat Rơdiô. Geh dơ̆ iat jơnau yal bè broă 5 nă oh dềt gơtìp bŭ dà, hơ̆ sồng cau đơs jơnau đơs tơngkah làng bol kàl rlô bơkang pal sền gròi, trăng sền kòn sau, ờ gŏ di lời ală sau lòt um is dà dờng, dà croh. Añ gŏ ală jơnau tơngkah bè do geh kuơ mùl màl ngan. Kòn ùr añ dê lơh Facebook añ in, tŭ ru añ sền mờ gŏ jơnau đơs dà kòn cau M’nông bơh Anih jơnau đơs Việt Nam dê, geh yal yau, đơs pơnđik, geh video, mờ sap đơs pơnđik ală cau mờ añ kwèng tai. Añ kờñ ngan sền”.

Gơ wèt mờ bi Thị Nia, ơm tàm ƀòn Tu Suay, sàh Đức An, càr Lâm Đồng, jơnau đơs dà kòn cau M’nông bè dùl pang sră cih mờ tê mùl màl. Bi iat bơh jơnau pràn kơldang să jan ală cau in, bơta chài rơcang kơryan kòp mprơm duh să, kòp mprơm gơlik mhàm tus ală jơnau pơlam tam chi lơi, ròng phan lơi nàng ngui tàm broă lơh sa. Rơdiô dềt gơ gơs là bơyô đềt mềr, cèng bal jơnau pơnđik nggồr chờ tàm tiah kơh bơnơm dờng. Bi Thị Nia chờ hờp yal: “Añ iat Rơdiô uă ngan. Lòt lơh mìr den điện thoại geh tŭ ờ geh mạng den tàng añ cèng rơdiô. Geh tiah den gùng pờ ờ pràn, añ pal dŏ angten gơguh jơnhua, kơt hơđang ntê chi den hơ̆ sồng gơtùi iat loh. Pŏ ù jàu, jì nhơt jài, iat Rơdiô jài, gơ lơh chờ hờp ngan. Tàm hìu den añ iat mờ sền Facebook. Añ gŏ Facebook dà kòn cau M’nông niam ngan. Ală video bè đơs pơnđik dà kòn cau M’nông tàm pang Facebook hơ̆ den añ pà like sùm. Añ kung sùm iat sền H’Thi yal yau kòn cau M’nông. Mìng kờñ pờ điện thoại là gơtùi sền mơ, tŭ lơi ru den sền wơl kung gơtùi sơl”.

Geh cau iat jơnau đơs dà kòn cau M’nông nàng git bơta chài rơcang kơryan kòp, bơta chài lơh sa; geh cau den kơp gơn dùl jơnau pơnđik, dùl jơnau yal yau; geh cau sền nàng bơsram tai dà đơs kòn cau he dê. Jơnau đơs dà kòn cau M’nông VOV Tây Nguyên bè hơ̆ mờ ngềt ngơt mut tàm rài kis. Bi H’Juel Sinur, cau cih jơnau đơs dà kòn cau M’nông, Ƀău pờ tơlik jơnau đơs - Sơñio rùp càr Lâm Đồng yal: “Tơnơ̆ dùl ngai lơh broă, añ kờñ ngan pờ jơnau đơs dà kòn cau M’nông Anih jơnau đơs Việt Nam dê nàng iat jơnau pơnđik, iat yal yau. Uă dơ̆ lòt tàm kâp hơ đơm, làng bol sùm lùp añ là đah sau dê geh yal yau, geh đơs pơnđik bè VOV sơl, đah hơ̆ bol khi yal yau niam ngan. Den jat añ, hơ̆ là bơta lơh geh cồng nha ngan bơh mpồl lơh Jơnau đơs dà kòn cau M’nông VOV Tây Nguyên dê, tài ờ mìng yal jơnau tơnggit mờ gam pơgồp bơnah sền gàr ală gùng đơs pơnđik, jơnau yal yau mờ bơta niam chài kòn cau dê tàm gah pờ tơlik jơnau đơs tai”.

Dilah lài do làng bol pal kơp di tŭ jơ nàng iat rơdiô den tŭ do, mìng mờ điện thoại ngac ngar, dà kòn cau M’nông neh geh mat tàm tơl tŭ, tơl tiah.

Pang web VOV M’nông mờ Fanpage “Dà kòn cau M’nông VOV Tây Nguyên” neh mờng kwèng ngan mờ làng bol. Kờp bal pah poh, website geh rlau 70 rbô dơ̆ cau pờ sền; pang Fanpage geh rlau 6 rbô nă cau jat sền. Uă jơnau cih, video geh git nđờ jơt rbô nă cau sền. Ală khà do ai gŏ, mờng kwèng neh tam gơl, mơya jơnau kờñ geh iat jơnau đơs dà kòn cau den gam bè ờs.

Gơ wèt mờ bi Y Sưng Phêja, cau đơs Jơnau đơs dà kòn cau M’nông VOV Tây Nguyên, bơta tam gơl hơ̆ là dùl tŭ tơngai bơsram is mờ gơ dờp: “Bơh chờm, tŭ tam gơl lơh ƀău uă bơta, broă bơsram tai măi mok pa gơ wèt mờ bol hi là dùl bơta ờ ƀuơn dùl êt lơi. Mơya bơh bơta tam gơl hơ̆ neh cèng wơl uă tŭ niam rlau, dong Jơnau đơs dà kòn cau M’nông tus rềp rlau mờ bơyô iat rơdiô. Añ kờñ ngan lơh broă jat bơta tam gơl pa do, tài he ờ mìng yal jơnau tơnggit bơh anih pờ tơlik jơnau đơs mờ gam lơh gơ rề Jơnau đơs dà kòn cau M’nông mờ niam chài kòn cau M’nông tàm măi mok sồ nàng uă cau git tus rlau, is ồn là cau kơnòm să. Gơ wèt mờ añ, do ờ mìng là bơta kơn jơ̆, mờ gam là bơta gơn kơnờm nàng pah ngai bơsram mờ lơh pa is să tờm he dê”.

Hơ wơl bơta jơh nùs hơ̆ là nùs nhơm đềt mềr bơyô iat Rơdiô dê pơyua wơl jat tơl tin nhắn tàm fanpage dà kòn cau M’nông.

Bè Facebook Điểu Chí Jam pơyua jơnau đơs: “Ală jơnau pơnđik niam ngan, dơ̆ lơh chờ do tềng lơi mờ niam ngan bè hơ̆ taih ală bơyô… Ală bơyô pơnđàng uă jơnau pơnđik, jơnau yal yau kòn cau M’nông tàm Facebook tai yơ, iat niam ngan”.

Halà Facebook Điểu Ntri pơyua jơnau pơn jờng: “Oh mi pơn đơl ngan yơ, lơh broă gơ in niam nàng cau in git là cau M’nông he geh uă bơhiàn niam, bơta niam chài niam krơi is. Bol he lơh ngan den hơ̆ sồng gơtùi gàr dà đơs kòn cau he dê. Jơnau kờñ là nàng sền gàr dà đơs, yal tơnggit niam chài, añ gŏ niam ngan”.

Ală jơnau pơyua, jơnau pơn jờng hơ̆ pơyua bơta kơp kơnờm jơnau đơs dà kòn cau M’nông bơh Anih jơnau đơs Việt Nam dê mut tàm dùl gùng pa tam gơl pràn rlau tai bơh tŭ tơngai 20 nam pờ tơlik jơnau đơs sơn rờp. Ồng Y Thịnh Bon Yôk Ju, Phó Chủ tịch Anih duh broă Làng bol càr Dăk Nông lài do, cau geh uă nam kơlôi sơnơng niam chài kòn cau M’nông đơs: “Ờ mìng geh ơruh pơnu lơm gời, jơh bal uă cau dùl rài bal mờ bol hi, ală cau deh nam 1960, 1970 kung neh git ngui Facebook, Zalo, YouTube nàng sền jơnau yal tơnggit, iat jơnau đơs crih halà sền wơl ală jơnau đơs mờ dà kòn cau M’nông. Bè hơ̆ den tàng bơdìh mờ pờ tơlik jơnau đơs ờs mờng, jơnau đơs dà kòn cau M’nông kờñ pal khin cha pơnđàng tàm ală măi mok sồ nàng làng bol kòn cau tàm lơgar mờ lơgar ndai ndrờm gơtùi iat, sền. Bơdìh hơ̆ tai, mpồl cau lơh jơnau đơs do kung pal khin cha ngui ală măi mok pa, kờp bal mờ bồ tơngoh jak kòn bơnus lơh gơs AI, nàng lơh tơngume gơ in niam rlau, gơ kờñ rlau. Mơya bulah tam gơl bè lơi den bơta kuơmàng ngan rlau jơh kung gam là mblàng yal jơnau tơngit di, gơtùi gàr dà đơs, bơta niam chài krơi is mờ ală bơta kuơ bơh yau kòn cau M’nông dê. Kơp kờñ ală sau pơn jat tai gàr ồs gơboh broă lơh, lòt uă rlau tai, rềp làng bol rlau, ngai sơlơ bơsram, đòm jat mờ tam gơl pa broă lơh nàng dà kòn cau M’nông ngai sơlơ brồ guh ngài tàm ală măi mok mblàn yal jơnau pa. Añ pin dờn là, tŭ dà kòn cau M’nông gam geh đơs tàm gah pờ tơlik jơnau đơs mờ geh pờ tàm ală măi mok sồ den bơta niam chài kòn cau he dê rơp gam geh sền gàr mờ tam pơrdờn wơl bơh uă rài”.

20 nam - bulah là tàm gah pờ tơlik jơnau đơs ờs mờng halà bơh ală video lơyah tàm Facebook, website… dà kòn cau M’nông VOV Tây Nguyên gam pờ gơs ală gơl gùng pa nàng lòt tus ală ƀòn. Mờ bơta jơh nùs ală cau cih, ală cau đơs dà kòn cau M’nông mờ bơta lòt bal bơh cau iat rơdiô dê, dà đơs, akhar cih mờ huềng sồp niam chài cau M’nông dê rơp pơn jat tai geh mpong ntas, gơ rề kơ̆ dơn tàm rài kis tŭ do.