Uă bă ù ơm, ù kă bro phan- drơng broă geh sền gĭt lài do tàm ƀòn dờng Buôn Ma Thuột càr Dăk Lăk dê, tŭ do gơ gơs ù brê, ù tam tờm chi neh gơrềng tus broă lơh hìu prap phan, anih lơh broă lơh gơlik phan bơh uă mpồl lơh sa kă bro dê. Tàm pơrjum tìp mat tơm bơh bơr đah kwang đơng lam bồ Anih duh broă làng bol ƀòn dờng mờ ală mpồl lơh sa kă bro geh bơyai lơh ngai 27/11, uă mpồl lơh sa kă bro neh đơs broă do mờ kơ̆p kờñ Anih duh broă làng bol ƀòn dờng Buôn Ma Thuột geh broă lơh tă bơsong, gờñ lơh geh ală tiah lơh sa, lơh gơlik phan nàng mpồl lơh sa kă bro in geh broă rơndăp lơh bơcri priă di pal. Ală mpồl lơh sa kă bro đơs là, bơta tam gơl tàm jơnau kờñ ngui ù tàm sră wăc sềr rơndăp ù tiah pa geh uă bơta ờ ring bal pơndrờm mờ rơndăp ù tiah lài do dê.

Hơ bè tơngume do, ồng Vũ Văn Hưng, Củ tịc Anih duh broă làng bol ƀòn dờng Buôn Ma Thuột, càr Dăk Lăk dờp geh bơta ờ hềt di pal tài bơh bơta gĭt wă bè rơndăp ù tiah bơh dùl mpồl kwang bàng lơh broă lơh rơndăp ù tiah ờ hềt di, uă mpồl lơh broă bơto pơlam ờ hềt lòt tus tơl kơnhoàl ù tiah gơ lam tus broă rơndăp ù tiah tìs. Bè broă bơsong nàng bơsong bơta do, ồng Vũ Văn Hưng pà gĭt, ƀòn dờng gam tam gơl wơl niam rơndăp ù tiah bal bơh ƀòn dờng dê, tŭ lơh sir broă rơndăp ù tiah bal den rơ̆p tam gơl jơh wơl, rê wơl ù di jat mờ ù tiah bơh làng bol lài do dê.