Mpồl duh broă Làng bol càr Dăk Lăk neh sền sơwì, ring bal 11 jơnau lơh nền di mờ adăt boh lam, 19 jơnau lơh nền krơi is mờ jơnau sồr uă tơngu me kwơ màng ndai. Do là tơngu me tờm, ai geh gùng dà broă lơh nàng lơh pràn bơtàu tơnguh lơh sa mpồl bơtiàn, gàr niam rài kis broă lơh broă sa mpồl bơtiàn dê.

Nam 2025, càr Dăk Lăk ai jơnau lơh kờñ gơguh lơh sa geh 7%, priă geh tơl nă cau geh 81 tơlăk đong, rề dia dà lơgar lơh ngan geh 9 rơbô tơmàn đong, khà hìu rơƀah gơmù bơh 3% rơlao hờ đang. Đơs tàm dơ̆ tơn jơh pơrjum, mò Huỳnh Thị Chiến Hoà, Củ tịc Mpồl duh broă Làng bol càr Dăk Lăk sồr, ală kấp, gah lơh broă tàm càr tơrgùm lơh jăt broă tam gơl pa, rơndăp tăp sèng mpồl kwang bàng lơh broă cíñ trị; tơnguh pràn, lơh pràn nàng lơh geh cồng nha ală jơnau kờñ, kơnòl broă neh geh ai.