Tàm pơrjum dơ̆ 2 Mpồl đơng lam Đảng ƀộ càr Dăk Lăk neh tơrgùm cribơyai bè ală broă jàu, broă rơndap lơh bơtàu tơnguh lơh sa – mpồl bơtiàn, sền gàr dà lơgar – lơngăp lơngai 6 nhai lồi nam 2025. Bơh cồng nha lam lơh 6 nhai bồ nam do lơh geh khà gơguh lơh sa rlau 7%, càr tơlik jơnau kờñ gơguh lơh sa gùt nam geh bơh 8% rlau hơđang, lùp dồs priă dia geh rlau 16 rbô 300 tơmàn đong, priă lơh geh kờp bal geh 80 tơlak đong dùl nă cau tàm nam 2025.

Jat ồng Nguyễn Đình Trung, Ƀí thư Tỉñ ủy càr Dăk Lăk, nàng lơh gơs ală jơnau kờñ, càr pal gờñ pồ tơl gơnoar atbồ 2 kâp jat gùng dà tơrmù lơyah, geh cồng nha; tơnguh pràn jak atbồ, đơng lam ală kâp, ală gah broă; mpồl kwang bàng pal tơnguh nùs nhơm geh kơnòl, tơrgùm đơng lam bồ, sồr lam lơh kràñ cê ală kơnòl broă, broă lơh tờm. Pơrjum kung cribơyai, ai jơnau đơs tàm bàr pe tơngume kuơmàng rơcang ai pơrjum dờng Đảng ƀộ càr Dăk Lăk in tơngai lơh broă bơh nam 2025 tus nam 2030.