Càr Dăk Lăk lơh pràn ngui tam gơl sồ tàm broă drơng lơh sră pơ-àr gơnoar atbồ dà lơgar
Thứ hai, 08:00, 07/07/2025 Cau mblàng Ndong Brawl/Cau cih H’ Xíu (VOV) Cau mblàng Ndong Brawl/Cau cih H’ Xíu (VOV)
VOV4.K'Ho- Bal mờ gùt lơgar, càr Dăk Lăk mùl màl lơh broă gơnoar atbồ bàr kấp. Tờm dùl poh lơh broă jăt broă lơh pa, 102 sàh, sơnah ƀòn tàm càr neh lơh ngan ngui tam gơl sồ tàm broă lơh sră pơ-àr gơnoar atbồ dà lơgar kung bè bơto sồr làng bol tŭ tus lơh broă nggal.

Tàm Anih tờm lơh broă sră pơ-àr gơnoar atbồ dà lơgar sàh Hoà Phú, càr Dăk Lăk, ală ngai sơnrờp nhai 7 neh geh uă làng bol tus lơh ală sră nggal. Lơh gơs jơnau yal sră nggal tàm internet mờ dờp pang sră yal cồng nha neh lơh gơs, ồng Nguyễn Thế Lâm, kis tàm thôn 9, sàh Hoà Phú yal, bŭ lah ală ngai sơnrờp lòt lơh broă jăt broă lơh pa, mơya neh geh ală tam gơl niam bơnĕ ngan tàm broă lơh bơsong ală sră nggal.

Ồng Nguyễn Thế Lâm đơs: “Bơta niam ngan añ gŏ là is mờ lài ngan, hơ̆ là lài do pal kơ̆p, hơ̆ sồng ală sră pơ-àr gơtìp ntrờn tus tàm anih lơh broă do, anih lơh broă ndai, mơya tŭ do den neh tam gơl sồ gam geh lơh tàm broă lơh, tơl broă lơh pah ngai he dê. Ngui măi mok sồ tàm broă lơh den sră pơ-àr geh bơsong mhar niam mờ geh cồng nha uă”.

Kung ndrờm bè hơ̆ sơl, Anih tờm lơh sră pơ-àr gơnoar atbồ dà lơgar sơnah ƀòn Buôn Ma Thuột, càr Dăk Lăk dê, làng bol tĕ sèng nàng tă sồ lơh ală broă nggal. Ồng Vũ Đức Hưởng, kis tàm sơnah ƀòn Ea Kao, càr Dăk Lăk pà git, bŭ lah ngai do gơnoar atbồ bàr kấp mùl màl mŭt lơh broă, ală sră nggal gơtùi lơh tơn tàm sơnah ƀòn he ơm kis, mơya tài bơta mờng den tàng ồng kung gam tus hìu lơh broă sră pơ-àr gơnoar atbồ lài do bơh ƀòn dờng Buôn Ma Thuột lài do dê nàng lơh ală sră nggal.

Ồng di nùs ngan tài ală sră nggal ndrờm geh lơh tàm internet jơh, bơh broă tă sồ tus mờ tŭ cau lơh broă dờp sră nggal, tơrwơl cồng nha lơh sră nggal dê: “Añ tus tàm do nàng tam gơl sră ngui ù pơrhê gơs sră dum ti. Tài tàm tiah do añ neh lơh mờ cau lơh mhar ngan den tàng añ tus tàm do nàng lơh. Đơs ngan là jơnau cih den krơi is di mơ, broă lơh kung krơi is di mơ, mơya rơhời den kung mờng sơl. Tơnơ̆ do di gơlan là kwang bàng bơto sồr den git là ơm kis tàm ƀòn lơi lơh sră nggal tàm ƀòn hơ̆ den ƀuơn rơlao. Gam tŭ do mìng rơ̆p lơh broă tàm ală ngai sơnrờp, den añ kung gam tus tàm anih lơh broă lài do nàng lơh sră nggal sơl”.

Ală ngai do, jơh ală làng bol tus ală anih lơh sră pơ-àr gơnoar atbồ lơgar tàm ală sàh, sơnah ƀòn tàm càr Dăk Lăk nàng lơh ală sră nggal kờñ lơh, bè: sră yal deh, sră yal chơ̆t, sră sền gàr gah lơh sơnơm, sră dan mŭt bơsram, sră dờp ơm kis, sră dan ngui ù… Nàng dong kờl làng bol, ală kwang bàng, cau lơh broă tàm anih lơh broă sră pơ-àr gơnoar atbồ dà lơgar kung neh lơh ngan lơh broă, lơh mờng mờ phan lơh broă ngui bal tàm broă lơh gơnoar atbồ ƀòn lơgar bàr kấp dê.

Ồng Nguyễn Đăng Huy, cau lơh broă tàm Anih lơh broă sră pơ-àr gơnoar atbồ dà lơgar sàh Hoà Phú, càr Dăk Lăk yal, bơh tŭ lơh broă tơrlòng lài broă lơh pa, ală kwang bàng, cau lơh broă tàm anih lơh broă ờ geh ngai ơm rơlô. Jơh ală cau ndrờm lơh broă tus trồ mang nàng lơh ndrờm bal ală sră nggal, lơh broă niam, di pal mờ jơnau kờñ bơh làng bol dê: “Jơh ală cau lơh broă, lơh broă tàm Anih lơh broă sră pơ-àr gơnoar atbồ dà lơgar sàh Hoà Phú tus bơh uă ƀòn krơi is den tàng broă tơrgùm bal, git ală bơta, lơh broă tơrlòng lài den niam, mơya tŭ mŭt lơh broă bơh drim tus tŭ do kung gơtìp ală bơta bè khà sră nggal gơrềng tus mờ phan lơh broă sră nggal gam pa, den tàng broă tơrgùm, bơsrong kung gơtìp kal ke, mơya oh mi kung gam lơh ngan nàng lơh gơs”.

Tàm ală sàh, sơnah ƀòn tàm càr Dăk Lăk tàm ală ngai do, ală mpồl cau chài phầm mềm mờ cau lơh broă gah Viễn thông Dăk Lăk (VNPT) tus dong kờl kwang bàng, viên cứk lơh broă mờ phan lơh broă dà lơgar kung bè dong kờl làng bol tus lơh sră nggal. Jăt ồng Nguyễn Nam Quốc, Kwang lam bồ Viễn thông Dăk Lăk yal, mpồl lơh broă dong kung dong kờl ală phan bơna lơh broă sră nggal nàng dong kờl làng bol gơtùi lơh ală broă lơh drơng ala sră nggal tàm internet.

Gơwèt mờ càr Dăk Lăk pa, broă bơsram tàp, bơto sồr kwang bàng, cau lơh broă ală mpồl lơh broă sàh, sơnah ƀòn tàm broă ngui phan lơh broă bal neh geh lơh bơh lài, tàm hơ̆ uă ngan là gơwèt mờ tàm ală sàh, sơnah ƀòn gơwèt càr Phú Yên lài do, nàng tŭ tam gơl ngui phan lơh broă bal pa den ală cau lơh broă gơtùi lơh tơn broă. Ồng Nguyễn Nam Quốc pà git: “Bè tàm càr Dăk Lăk, tơl sàh, sơnah ƀòn den ndrờm geh ai ờ uă ngan 2 nă cau git bè phầm mềm mờ dùl nă cau lơh broă git lơh nàng tŭ lơi kung dong kờl, bañ lời gơtìp ală bơta lơi bè ờ gŏ, roh bơta tơrbŏ bal phan lơh broă lơi tàm ală anih lơh broă drơng làng bol in. bơdìh hơ̆ tai, VNPT Dăk Lăk kung gam lơh ală mpồl dong kờl mhar mờ ală sồ điện thoại nàng jơh ală anih lơh broă tŭ gơtìp ală bơta lơi ờ niam geh bal broă tơrbŏ bal phan bơna, kung bè broă drơng làng bol in gơtìp kal ke den geh dong kờl di tŭ ngan”.

 

Cau mblàng Ndong Brawl/Cau cih H’ Xíu (VOV)

Viết bình luận

TIN CÙNG CHUYÊN MỤC