Pơn jăt tai ală broă lơh tàm dơ̆ lòt còp kâp Dà lơgar tus lơgar Hàn Quốc, mho ngai 11 nhai 08 tàm càr lơgar Seoul, Tổng Ƀí thư ồng Tô Lâm neh geh dơ̆ tìp măt kâp dờng mờ Thủ tướng lơgar Hàn Quốc ồng Kim Min Seok. Tàm dơ̆ tìp măt kâp dờng, Tổng Ƀí thư ồng Tô Lâm đơs nền Việt Nam sùm sền kwơ gĭt gơ̆p lơh broă bal mờ lơgar Hàn Quốc mờ kơ̆p kờñ bal mờ lơgar Hàn Quốc lơh jrô ơnàng rlau tai gĭt gơ̆p Tam klăc lơh broă bal jŏ jòng tơl làm đah Việt Nam mờ Hàn Quốc.

Tổng Ƀí thư ồng Tô Lâm sồr bàr đah lơh ngan lơh gơlik geh bơta tam klăc đềt mềr, jŏ jòng đah bàr lơgar; jờng rơ bàr đah neh kĭ tơn jŏ tơngai lơh jăt Sră cih kah bè broă lơh ai gơnoar ai cau lơh broă lơgar bơdìh in đah Việt Nam mờ Hàn Quốc; tơngguh tai lơh broă bal bơto bơtê, sồr Hàn Quốc dong kờl bơto mpồl cau lơh broă geh broă lơh jak uă bè ƀán zẫn, rơndeh đèng, măy mŏk siñ họk, lơh sa mờ măy mŏk lơh ơhò, bồ tơngoh jak kòn bơnus dê lơh is. Thủ tướng ồng Kim Min Seok đơs nền rơ̆p pơn jăt tai sền gròi lơh broă bal mờ Việt Nam sơlơ bơto tai mpồl cau lơh broă geh broă lơh jak uă drơng ai bơta bơtàu tơngguh lơh sa bàr lơgar in tàm tơngai tus.