Tơngai bơh nam 2026-2030, 2 gah ring bal sơlơ tơnguh tai lơh broă bal tàm ală gah kă bro phan, bơcri priă, broă lơh sa suơn sre, lòt nhơl, bơto bơtê mờ bơsram, bơtàu tơnguh mpồl cau lơh broă, niam chài – mpồl bơtiàn mờ lơngăp lơngai.

Tàm hơ̆, 2 càr rơ̆p sơlơ tơnguh tai tàm tơrbŏ bal mpồl lơh sa kă bro, gơ hòi gơ jà kă bro phan, bơcri priă, tam pà bal mờng chài lơh sa, lơh gơlik phan lơh geh bơh broă lơh sa suơn sre mờ bơt bơtàu ală phan bơna lòt nhơl bal. Dăk Lăk mờ Champasak pơn đơl pràn lơh ngan ai bơta kwơ kă bro phan- drơng broă đah 2 gah gơguh bơh 15 tus 20% pah nam mờ sơlơ tơnguh tai lơh geh bơh 5 tus 10 rơndăp broă lơh bơcri priă lơh tàm 5 nam. Ồng Nguyễn Thiên Văn, Phó Chủ tịch Anih duh broă Làng bol càr Dăk Lăk đơs là broă pờ ơnàng lơh broă bal lơh sa rơ̆p lơh geh tai bơta gơn kơnờm ai bơta gĭt gơ̆p đah 2 tiah dê.