Tàm tơngu me dơ̆ lòt còp, Mpồl neh geh ală dơ̆ tìp mat, lơh broă mờ Mpồl Nghị sìh Lơh bơyô bal Brazil mờ Việt Nam; Mpồl Lơh bơyô bal Brazil mờ Việt Nam; Đảng Cộng sản Brazil mờ Đảng Lao động Brazil. Lơh broă mờ Mpồl Nghị sìh Lơh bơyô bal Brazil mờ Việt Nam, 2 gah ring bal đơs là Việt Nam mờ Brazil geh uă bơta pràn, bơta ƀuơn nàng dong kờl bal mờ gơ̆p.

Cribơyai bè lơh broă bal lơh sa, 2 gah đơs là cồng nha lơh geh ờ hềt ndrờm pal mờ bơta pràn mờ tơngume bơta gĭt gơ̆p Tam klăc lơh broă bal Kwơ màng. Ồng Lê Hồng Quang sồr Quốc hội Brazil, ngan là Mpồl Nghị sìh Lơh bơyô bal Brazil mờ Việt Nam, pơn jat tai dong kờl bal lơh sir tơngume adat boh lam, lơh geh ală bơta ƀuơn ngan ai mpồl lơh sa kă bro 2 lơgar in bơcri priă lơh, lơh sa kă bro; sơlơ tơnguh tai lơh broă bal tàm ală gah broă lơh sa suơn sre ngui măi mok pa, lơh sa mờ măi mok lơh gơlik phan, năng lượng lơh gơlik wơl, tam gơl sồ, jak chài- măi mok, logistics mờ bơto bơtê mpồl cau lơh broă.