Jăt rơndăp ù tiah tơngai bơh nam 2026 tus 2030, mờ wèt tus nam 2050, càr Dăk Lăk ai geh gùng dà broă lơh, lơh gơs 3 tiah lơh sa, tàm hơ̆ geh Tiah lơh sa Nam Phú Yên, Tiah lơh sa krơi is đah măt tơngai Mŭt mờ Tiah lơh sa mpồng nhàr lơgar Dăk Ruê. Mờ càr ai rơndăp ù tiah 31 tiah lơh sa mờ măi mok mờ kờp jơh bă ù ơnàng rơlao 8 rơbô 900 lồ. Mơya, tŭ do mìng rơ̆p geh 7 tiah lơh sa mờ măi mok mờ 21 mpồl lơh sa mờ măi mok geh rơndăp ù tiah nền nòn, bơcri priă lơh; tàm hơ̆ mìng geh ờ uă khà neh geh tơl 100%.

Jăt ồng Đỗ Bá Phú, Lam bồ Kụk Hòi jà kă bro phan gơwèt Bộ Lơh sa mờ măi mok kă bro phan pà git, nàng tơnguh uă cồng nha bơcri priă mờ tơnguh bơta niam bơh ală tiah, mpồl lơh sa mờ măi mok dê, càr Dăk Lăk pal bơtàu tơnguh phan bơna jăt gùng dà broă lơh ndrờm bal, pơgồp bal nền nòn mờ mpồl logistics tơrbŏ bal tiah mờ ală năng lượng tơlir. Bơta do ờ mìng dong kờl tơrmù priă tă bơcri mờ gam tơnguh uă cồng nha lơh broă tàm tơngai jŏ jòng. “Ală tiah lơh sa mờ măi mok do pal geh ai tàm rơndăp ù tiah mpồl logistics tơrbŏ bal tiah, tơrbŏ bal geh tiah đah măt tơngai Lik mờ tiah đah măt tơngai Mŭt, đah Tây Nguyên mờ mpồl anih ơhò dà lềng ơm. Nàng tềm pềr năng lượng, den ală tiah, mpồl lơh sa mờ măi mok geh rơndăp ù tiah pa pal geh lơh tơrgùm bal, ai geh bơta niam nàng bơtàu tơnguh ală rơndăp broă năng lượng tơlir tàm tiah, mpồl lơh sa mờ măi mok, hoàc huơr broă bơcri bơh kes priă mờ lơh geh bơta kal ke tus mờ gah ồs đèng dê”.

Mùl màl pà gŏ, tiah gơkòl dờng ngan tŭ do bơh càr Dăk Lăk dê ờ mìng geh tàm phan bơna tiah lơh sa mờ măi mok mờ gam tàm bơta pràn tơrbŏ bal logistics mờ anih ơhò dà lềng ơm, ƀlàng rơndeh par mờ ală gùng dà broă lơh pơn diang phan ndai. Tŭ priă tă logistics gam kas, tơngai pơn diang jŏ jòng, bơta pràn bè tiah lơh phan kal ke kờñ tam gơl gơs bơta pràn tàm pơrlòng bơh gah lơh gơs phan nền nòn dê.

Đại tá ồng Nguyễn Thành Sơn, Chủ tịch Mpồl duh broă atbồ broă lơh Công ty Cổ phần Anih ơhò ơm Cát Lái, ƀòn dờng Hồ Chí Minh đơs là, logistics là “gùng mhàm” bơh gah lơh sa dê. Tàm tŭ hơ̆, càr Dăk Lăk tŭ do kung gam gơrềng tờm ngan tàm broă pơn diang phan mờ gùng ù gờl; pơn diang phan mờ gùng dà lềng mờ gùng rơndeh par ờ hềt geh lơh, lơh geh cồng nha. Den tàng, càr pal gờñ lơh ală tiah tờm logistics pa nàng tơrmù priă tă mờ tơnguh uă bơta pràn pơn diang phan kă bro dê. “Bơsram ală jơnau bơsram bơh tàm ală lơgar dê, he pal cèng phan kă bro tus ƀlàng rơndeh den broă pơn diang rơ̆p mhar rơlao. Tàm tŭ logistics, ƀlàng rơndeh par là anih pơn diang phan bàr đah, là tiah tờm prăp gàr, dăp klơm, pơn diang phan kă bro, mờ là anih lơh pràn gơguh bơta kwơ dê. Ƀlàng rơndeh par là anih pơn diang phan kă bro tăc mờ blơi phan mờ lơgar ndai niam. Añ gŏ tàm càr Dăk Lăk là tiah lơh di pal ngan là tàm sàh Ea Ô, do là tiah ngài mờ càr Khánh Hoà tàm pơgăp 60 kơi sồ, gơdờp ngan mờ gah logistics dê”.

Tơnơ̆ mờ tơmŭt bal, càr Dăk Lăk geh uă ù ơnàng rơlao 18 rơbô kơi sồ vuông, ơm dơ̆ pe gùt lơgar dê, tơrgùm jơh bơta kwơ tiah lơh gơs phan bơh broă lơh sa suơn sre dờng ơnàng tàm tiah đah măt tơngai Mŭt dê mờ mpồl anih ơhò ơm dà lềng, tiah lơh sa mờ măi mok, lơh sa dà lềng tàm tiah đah măt tơngai Lik. Broă tơrbŏ bal do pờ geh dơ̆ niam nàng lơh gơs mpồl geh kwơ ndơ̆p ngan bơh lơh phan, lơh gơs phan ngui tus mờ tăc mờ lơgar bơdìh. Mơya, nàng lơh bơta geh gơs bơta pràn gơguh lơh sa, jơnau bè phan bơna lơh sa mờ măi mok mờ logistics pal geh bơsong ndrờm bal.

Ồng Đào Mỹ, Phó Chủ tịch Anih duh broă Làng bol càr Dăk Lăk pà git, càr gam tơrgùm lơh niam sră nggal, lơh gơs rơndăp ù tiah, mpồl lơh sa mờ măi mok, bơcri priă bơtàu tơnguh phan bơna anih ơhò dà lềng mờ loigistcis nàng ai geh bơta pràn lơh sa mờ măi mok lơh gơs phan nền nòn mờ tơnguh uă priă tăc phan mờ lơgar bơdìh. “Sờh Lơh sa mờ măi mok Kă bro phan, Mpồl Atbồ Tiah lơh sa Phú Yên mờ ală anih lơh broă gơrềng bal tơrgùm tơl jơnau đơs, jơnau pơgồp bal tàm pơrjum bơyai nàng yal Anih duh broă Làng bol càr in geh jơnau sồr lơh mùl màl. Jơnau đơs tus mờ khà măt ală rơndăp broă lơh tờm, phan bơna tiah, mpồl lơh sa mờ măi mok lơh gơs phan nền nòn mờ logistics tơngai bơh nam 2026 tus 2030 nàng rơcang lơh ală broă hòi jà bơcri priă. Jơnau dan geh ală broă lơh krơi is bè ù tiah, ai càn priă, pơlam mờ dong kờl broă lơh sa mờ măi mok, dong kờl tam gơl sồ, lơh broă yal mờ kấp geh gơnoar kung bè Dà lơgar in sền sơwì, ai ngui kơrnoăt boh lam di pal nàng dong kờl mpồl lơh sa kă bro”.

Bơta pràn bè broă lơh, tiah lơh phan mờ mpồng lik dà lềng mìng mùl màl geh gơguh tŭ geh tơrbŏ bal mờ mpồl logistics pa mờ phan bơna lơh sa mờ măi mok ndrờm bal. Mờ gùng dà broă lơh, lơh gơs rơndăp broă ù tiah, bơtàu tơnguh ală tiah tờm logistics, lơh pràn broă lơh gơs phan nền nòn mờ hòi jà ală cau bơcri priă kwơ màng, càr Dăk lăk gam rơhời lơh jăt mùl màl jơnau kờñ gơs tiah gơguh lơh sa pa bè lơh gơs phan nền nòn uă mờ logistics tàm tiah Tây Nguyên mờ jăt gah dà lềng đah jum tàm Gùl lơgar dê.