Tàm Dăk Lăk, lài mờ kàl mìu dà tih dà lìu nam do, 50 hìu bơnhă làng bol tàm ală tiah thòng lơyah kềng gah dà dờng Kỳ Lộ gơ wèt ală sàh Tuy An Bắc mờ Đồng Xuân neh geh dong kờl lơh 50 nơm hìu pơrđồng pleh dà tih dà lìu. Tơl nơm hìu ơnàng 20 thơk vuông, đah hơ đơm geh crăp phuy đù nàng lơh gơlik bơta pràn chồl pơrđồng; bàr geh jrong bê tông lam gùng. Tŭ dà gơguh tih, hìu rơp gơ pơrđồng jat dà tih, dong làng bol geh anih ơm pleh lơngăp lơngai.

Lài hơ̆, tơnơ̆ dơ̆ dà tih dà lìu dờng ngan ờ hềt geh bơh lài tàm nhai 11 nam lài, rlau 600 nơm hìu geh rơnđa jơnhua geh lơh bơh broă lơh dờng Quang Trung, dong rlau 600 hìu bơnhă geh anih ơm kơ̆ kơljap mờ pleh dà tih dà lìu dồ bă lơngăp lơngai.

Bơdìh hơ̆ tai, bơh kes priă dà lơgar mờ ală bơnah priă bơcri ndai, càr Dăk Lăk gam ai cau lơh broă, phan bơna, măi mok tơrgùm lơh 100 nơm hìu pleh dà tih dà lìu mpồl bơtiàn tàm jơh ală tiah thòng lơyah. Tơl nơm hìu ơm pleh dà tih dà lìu mpồl bơtiàn ơnàng mờr 200 thơk vuông, hìu kâp 3 kơ̆ kơljap, geh phan kơryan kơnàs, hìu jă brê mờ hìu ƀềp, gơtùi drơng 200 nă cau. Tŭ do, ală hìu do gam tàm tơngai lơh cờn 2 mờ lơh sir. Kờp dŭ tàm nhai 9 tus do rơp ai ngui. Bè hơ̆ den kàl mìu dà tih dà lìu nam do, broă pleh dà tih dà lìu làng bol tàm ală tiah thòng lơyah càr Dăk Lăk dê rơp gơ rơcang lài rlau. Ồng Đào Mỹ - Phó Chủ tịch Anih duh broă Làng bol càr Dăk Lăk yal:

“Bol hi sồr ală Mpồl atbồ, ală mpồl lam lơh tus bal lơh dồ bă mhar ngan rlau jơh, gờñ ngan rlau jơh dilah gơtùi. Mơya ờ di tài gờñ mờ bol he ờ gròi sền tus bơta kơ̆ kơnhăp mờ bơta niam. Tŭ do, bol hi kung gam pơn jat tai pồ tơl mpồl đơng lam rơcang gàr làng bol tàm kâp hơ đơm nàng gơ dờp mờ broă să tờm is drơng wơl mờ ală bơta gơlik geh tàm ƀòn lơgar”.