Sơnah ƀòn Hoài Nhơn Bắc là sơnah ƀòn pơnrơ ngan càr Gia Lai dê tàm broă bơ̆t bơtàu broă gùt làng bol sền gàr lơngăp lơngai Dà lơgar mờ uă broă lơh geh cồng nha bè “Mblàng yal niam – Bơsong geh cồng nha, tơn jơh tam lah”, “Mpồl cau ùr rơcang gàr lài pơrlồm tàm internet”. Prao nhai bồ nam 2026, làng bol tàm sơnah ƀòn neh ai 42 jơnau tơngit geh kwơ, dong kờl mpồl lơh broă geh gơnoar rơcang kơrian lài, tam dră mờ cau tìs mờ bơsong uă broă bơh tàm ƀòn lơgar tơn. Ồng Trần Hữu Thảo, Bí thư Đảng ủy, Chủ tịch Mpồl duh broă Làng bol sơnah ƀòn Hoài Nhơn Bắc, càr Gia Lai pà git, gàr kơl jăp lơngăp lơngai tàm sơnah ƀòn là kơnòl bơh jơh ală mpồl lơh broă chính trị, bơh tơl nă làng bol dê. “Lơngăp lơngai ờ do ờ dă geh kơl jăp den hơ̆ sồng lơh sa geh bơtàu tơnguh, rài kis bơh tơl hìu nhă hơ̆ sồng geh hờm ram, gơboh gơbài. Den tàng, gàr niam lơngăp lơngai ờ di là broă is bơh mpồl kwang àng dê mờ là kơnòl bal mờ gơnoar kwơ đềt mềr bơh tơl làng bol he dê”.

Tàm ngai chờ, Đại tướng ồng Trịnh Văn Quyết jờng rơ ală cồng nha mờ Đảng bộ, gơnoar atbồ bal mờ Làng bol sơnah ƀòn Hoài Nhơn Bắc, càr Gia Lai neh lơh geh tàm broă bơ̆t bơtàu broă lơh gùt làng bol sền gàr lơngăp lơngai Dà lơgar. Đại tướng đơs nền, sền gàr lơngăp lơngai Dà lơgar là broă lơh bơh gùt làng bol dê tềng đăp mờ broă đơng lam bơh Đảng, tàm hơ̆ mpồl Kwang àng làng bol gàr gơnoar tờm. Kờñ gàr kơl jăp lơngăp lơngai bơh gờñ, bơh ngài den pal gàr bơh tờm, mờ “Tờm là nùs nhơm làng bol” dê. broă gùt làng bol sền gàr lơngăp lơngai Dà lơgar kờñ bơtàu tơnguh mùl màl pal pơgồp bal mờ rài kis broă lơh broă sa mpồl bơtiàn, gàr niam ală làng bol ndrờm geh dờp cồng nha bơtàu tơnguh.

Kwang lam bồ Mpồl Mblàng yal Bơto bơtê Dà lơgar sồr càr Gia Lai pơn jăt tai lơh jăt mờ lơh geh cồng nha ală jơnau lơh nền tàm pơrjum bơh Dà lơgar dê bè bơ̆t bơtàu mpồl bơtiàn niam, lơngăp lơngai, gơguh jăk mờ Kwơ màng lơngăp lơngai dà lơgar; tam gơl broă mblàng yal, tơnguh uă bơta pràn tềng đăp mờ jơnau yal tơngit ờ niam tàm internet; tơnguh broă pơgồp bal đah Kwang àng, Ling klàng, mặt trận Dà lơgar mờ ală mpồl lơh broă; bơ̆t bơtàu mpồl kwang àng mùl màl rềp làng bol, sền kwơ làng bol, wă làng bol, tài làng bol drơng lơh.

Đại tướng ồng Trịnh Văn Quyết kung sồr càr Gia Lai kơlôi sơnơng rơwah sơnah ƀòn Hoài Nhơn Bắc lơh sơnah ƀòn tơrlòng lài broă lơh “sơnah ƀòn xã hội chủ nghĩa”: “Añ sồr càr Gia Lai kơlôi sơnơng rơwah sơnah ƀòn Hoài Nhơn Bắc là dùl tàm ală sơnah ƀòn tơrlòng lài broă lơh sơnah ƀòn xã hội chủ nghĩa tàm tơngu me bơh bơta geh niam, lơngăp lơngai, gơguh jăk, ndrờm bal, bơtàu tơnguh jăt nùs nhơm Jơnau lơh nền tàm pơrjum sồ 18 dê. He bơyai lơh jăt rơhời, mơya lơh ngan, lơh kơl jăp mờ geh phan mùl màl nàng pơn jăt tai lơh geh uă”.