Tàm bơnah broă XL01, gơ wèt Rơndap broă lơh dềt sồ 1 gùng rơndeh lòt mhar Khánh Hòa - Buôn Ma Thuột, ală mpồl neh rơndap ai ală mpồl lơh broă ngac ngar jat jơnau đơs “tơngai bơdìh, mìu dơlam”. Ồng Nguyễn Viết Chung, Đơng lam Mpồl lam lơh gùng brong Phượng Hoàng pà git, mpồl gam lơh ngan lơh bơtơl khà broă, mờ bơta tus bal bơh 345 nă cau lơh phan, cau chài drơng măi mok mờ 120 nơm rơndeh rơndồ, phan bơna:

“Trồ mìu halà trồ tơngai ờ lơh gơ rềng uă ir tus tơngai hơ pơrgon lơh gùng brong, mìng lơh gơ rềng tus ală bơnah broă hờ bơdìh là rbàng mờ gùng. Ală tŭ trồ tiah rañ rơsơh, bol hi ai tơngai jơh bal ngai mờ mang sồr oh mi lơh broă nàng gàr cồng nha lơh geh kung bè tŭ tơngai hơ pơrgon mờ cau bơcri priă sồr. Oh mi lơh ngan nàng lơh gơtùi. Broă rơndap lơh là ngai 31/12 tus do rơp lơh sir jơh bal 2 gùng brong mờ ai rơndeh lòt rê”.

Kung tàm nùs nhơm lơh broă jal mhar sơl, tàm bơnah broă XL03, ồng Nguyễn Văn Lê - Phó Kwang lam bồ đơng lam lơh jat cau tờm lơh gùng brong Cư Te pà git, mpồl tŭ do gam lơyài tơngai hơ pơrgon mờr 5% pơndrờm mờ broă rơndap lơh. Nàng bơ tơl wơl tơngai hơ pơrgon, mpồl lơh sa kă bro gam ai mờr 500 nă cau lơh phan, cau chài măi mok bal mờ 180 nơm rơndeh rơndồ, phan bơna, măi mok, lơh ngan jàu broă lơh di tơngai hơ pơrgon:

“Tŭ do, bol hi gam geh rlau 150 nă cau lơh phan, cau chài măi mok geh rơndap ai wil tơl măi mok nàng lơh jơh 3 bơta là gùng brong, rbàng mờ gùng. Tàm bơta nhai 8 geh mìu càl den bol hi rơndap lài là tŭ rơ hờt mìu den lơh bơdìh, tŭ trồ mìu den lơh tàm gùng brong. Broă tàm gùng brong kung geh tam pà lơh 3 dar, jơh nùs lơh broă. Tàm gùng brong đah kiau den neh lơh gơs; ai gùng brong đah ma den cau tờm lơh rơndap broă gam pơn đơl lơh gơs bơnah bê tông gùng brong dê mờ lă cài mat gùng tàm nhai 9 tus”.

Rơndap broă lơh dềt sồ 2 gùng rơndeh lòt mhar Khánh Hòa - Buôn Ma Thuột geh kờp jơh priă bơcri lơh rlau 10 rbô 400 tơmàn đong, jòng mờr 37 kơi sồ lòt gan ală sàh M’Drăk, Krông Jing, Cư Pui mờ Ea Kar, càr Dăk Lăk, bơh Mpồl atbồ gùng rơndeh ồs (Ƀộ Bơt bơtàu) lơh cau tờm bơcri priă. Gơl gùng lòt gan ù tiah kơh bơnơm kal ke, mờ 4 gùng brong gan bơnơm mờ 38 nơm rbàng hơđang mat gùng. Tơngai tŭ do, rơndap broă lơh lơyài 8,15% pơndrờm mờ broă rơndap lơh, mìng rơp pa geh rlau 86% khà broă bơt bơtàu, crăp mòn. Nàng bơ tơl wơl tơngai hơ pơrgon, ală cau lơh rơndap broă gam gàr sùm 71 mpồl lơh broă, ai 546 nơm măi mok, rơndeh rơndồ, phan bơna mờ mờr 1 rbô 400 nă cau chài măi mok, cau lơh phan lam lơh broă sùm 3 dar, 4 dơ̆. Ồng Phan Đình Hạc, ala mat mpồl pơlam jat sền pà git bè broă lam lơh tàm bơnah broă XL03 mpồl gam drơng kơnòl:

“Cau tờm bơcri priă sồr nền nòn ngan, bol hi là mpồl jat sền pal sùm geh mat tàm anih lơh broă, sồr ală cau tờm lơh rơndap broă tơnguh mhar tơngai lam lơh. Gơ wèt mờ bơnah broă rềp mờ Rơndap broă lơh dềt sồ 1 neh ai rơndeh lòt rê, gam bơnah broă mpồl lam lơh gùng brong Cư Te den gam tơrgùm lơh jơh bơnah broă tuh bê tông mat gùng brong mờ tơnring mat gùng, lă cài gùng. Ală cau lơh rơndap broă lơh ngan ai rơndeh lòt rê tàm ngai 02/9 tus”.

Rơndap broă lơh dềt sồ 1 mờ sồ 3 gùng rơndeh lòt mhar Khánh Hòa - Buôn Ma Thuột gam lơh gơs ală bơnah broă dut ndơl, lơh ngan ai ngui tàm nhai 9 tus do. Dilah rơndap broă lơh dềt sồ 2 gơtùi bơ tơl wơl tơngai hơ pơrgon neh lơyài den jơh gùt gơl gùng rơndeh lòt mhar Khánh Hòa - Buôn Ma Thuột rơp ai lòt rê tàm lồi nam do, ai lòt rê jơh gùt gơl gùng bơh bồ nam 2027 jat jơnau sồr lơh Chính phủ dê.