Dùl tàm ală bơta tờm lơh broă bơcri priă dà lơgar tàm càr Gia Lai geh cồng nha ờ uă là uăr ơndăp broă lơh tờm gam lơyài jăt mờ tơngai lơh geh ai. Tàm hơ̆, geh Rơndăp broă lơh Hìu bơsram jơi bơtiàn ơm sa bic tơn bàr kấp tàm 7 sàh tiah nhàr lơgar, Rơndăp broă lơh gùng mù mờ par sồ 2 tàm Ƀlàng rơndeh par Phù Cát mờ Rơndăp broă lơh niam wơl tiah tềl kah yau Gơlang cau Prum Dương Long. Pal kah ngan, gùng rơndeh lòt mhar Quy Nhơn – Pleiku, do là rơndăp broă lơh geh priă bơcri uă ngan mờ geh ai là dùl tàm ală bơta pràn gơguh lơh sa kwơ màng càr dê, kung gam ờ hềt gơtùi tơm ntrờn ù tiah tàm uă tiah tài gơl gùng lòt gan bă ù dờng ơnàng là brê hòn is. Ồng Nguyễn Tự Công Hoàng, Phó Chủ tịch Anih duh broă Làng bol càr Gia Lai, drơng broă lơh ală rơndăp broă bơcri priă bơ̆t bơtàu pà git: “Gơkòl là Sờh Broă lơh sa suơn sre mờ Tiah ơm kis pal bơsong jơh jơnau ù brê. Broă do den neh 8 nhai do Mpồl atbồ brê rơcang gàr lài ờ gơtùi lơh, poh lơi pơrjum kung đơs sùm. Bơnah broă lơh sồ 2 (Rơndăp broă lơh Gùng rơndeh lòt mhar Quy Nhơn – Pleiku) mìng là gơkòl ù brê”.

Ờ mìng gơkòl sră nggal adăt boh lam, ù tiah, tơngai bơcri priă dà lơgar tàm càr Gia Lai gam gơtìp gơrềng tài bơh tìs tàm broă bơyai lơh. Anih duh broă Làng bol càr Gia Lai đơs, tàm uă anih lơh broă atbồ geh broă lơh ờ di, pleh ha là đơs cau ndai dờp kơnòl broă. Tŭ sră nggal gơlik geh gơkòl, ala mờ broă rơcang pơgồp bal jòi tơl bơta nàng bơsong, den geh cau jào wơl sră, lơh tơngai bơsong gơtìp jŏ.

Ồng Phạm Anh Tuấn, Chủ tịch Anih duh broă Làng bol càr Gia Lai sồr ală mpồl lơh broă, ală sàh, sơnah ƀòn lơh jăt niam gùng dà broă lơh neh geh ai; bơsong mơ tơn bơta rơndăp tăp sèng lơh broă mờ lơh jăt nền nòn gùng dà broă lơh “6 loh”. Ồng Phạm Anh Tuấn pà git, Anih duh broă Làng bol càr Gia Lai neh bơ̆t bơtàu broă lơh lài loh làng, sồr ală mpồl lơh broă, ală sàh, sơnah ƀòn lơh jăt nền nòn nàng lơh gơs broă bơcri priă dà lơgar geh 100% tàm lồi nam. “Rơlao 30 khà broă bơh ală broă lơh Jơnau kờñ dà lơgar dê, kwang đơng lam ală mpồl lơh broă pal đơng lam di. Pal đơng lam bè lơi nàng ală khà priă neh geh, càr ngui dơ̆ ha là sàh ngui dơ̆ ndrờm pal ngui dơ̆ jơh. Tàm hơ̆, pal bơcri priă gờñ lơh gùng rơndeh lòt mhar Quy Nhơn – Pleiku mờ rơndăp broă lơh hìu bơsram tàm tiah nhàr lơgar. Bè broă bơcri priă dà lơgar, añ sồr pal tơrgùm tơl 100%".