Tàm nùs nhơm sơrmah sơrmài, dòn song jơh nùs mờ pin dờn bal mờ gơp, bàr Thủ tướng neh đơs tus bơta bơtàu tơnguh bơh git gơp lơh broă bal đah Việt Nam mờ Hà Lan tàm tơngai lài, cribơyai mờ ring bal ală jơnau pơlam gùng, broă rơndap lơh nàng kờñ ngui geh cồng nha bơta pràn, ai git gơp Lơh broă bal tơl làm gơguh tus khà jơnhua rlau tài bơta kuơ bàr lơgar dê.

Bàr gah pơn jat tai sơlơ tơnguh rlau tai cribơyai mpồl, ngan là kâp dờng; sơlơ gàr kơ̆ bơta pin dờn chính trị, wèt tus tơnguh bơta git gơp tus gơnoar broă pa; mờ kung sồr pơn jat tai pơgồp bal, dong kờl bal mờ gơp tàm ală anih cribơyai uă gah mờ ală lơgar. Bàr Thủ tướng kung cribơyai bè ală broă tàm tiah do mờ ală lơgar mờ jơh bal 2 gah sền gròi bal, đơs sùm bơta kuơmàng dờng ngan bơh broă gàr niam ring lơngai, kơ̆ kơljap, lơngap lơngai, ờdo ờdă mờ khat gơboh gùng dà lềng, gùng rơndeh par tàm tiah do mờ tàm dunia, bơh bơta tờm là adat boh lam ală lơgar, is ồn là Bơta kơp kờñ bal bè Adat Dà lềng nam 1982 (UNCLOS). Dơ̆ cribơyai tàm điện thoại sơn rờp đah bàr Thủ tướng Việt Nam mờ Hà Lan neh lơh geh cồng nha niam bơnĕ, mờ ală jơnau pơlam gùng, broă rơndap lơh lơh broă bal pa, pờ gơs tŭ tơngai bơtàu tơnguh bềng bơta kơp kơnờm ai git gơp Lơh broă bal tơl làm đah Việt Nam mờ Hà Lan dê in.