Tàm dơ̆ tìp măt cri bơyai, Tổng Bí thư, Chủ tịch lơgar pin dờn broă bơtàu tơnguh kơl jăp lơgar Australia dê ờ mìng cèng geh bơta pas gơs ai làng bol lơgar Australia, ai bơta git gơ̆p đah lơgar Việt Nam mờ lơgar Australia in mờ gam pơgồp bal niam ai bơta ring lơngai, kơ̆ kơl jăp mờ pas gơs tàm tiah do mờ tàm dunia.

Cri bơyai bè bơta git gơ̆p đah bàr lơgar, ồng Tô Lam, Tổng Bí thư, Chủ tịch lơgar đơs nền lơgar Australia là cau bơyô, lơh broă bal pin dờn, geh uă bơta kwơ jŏ jòng ndrờm bal mờ lơgar Việt Nam dê. Lơgar Việt Nam kờñ broă lơh bal mờ dong kờl bơh lơgar Australia dê tàm broă bơtàu tơnguh dà lơgar mờ kơ̆p kờñ ai bơta git gơ̆p đah bàr lơgar ngai sơlơ jrô ơnàng, mùl màl mờ geh cồng nha. Bè gùng dà broă lơh bal, ồng Tô Lâm, Tổng Bí thư, Chủ tịch lơgar sồr bàr lơgar pơn jăt tai tơnguh nùs nhơm pin dờn chính trị bơh broă cri bơyai kấp dờng mờ ală gah lơh broă bal; rề ơnàng lơh broă bal sền gàr dà lơgar - lơngăp lơngai; lơh pràn kă bro phan, bơcri priă, wèt tus jơnau kờñ geh khà bàr đah 20 tơmàn Dolar Mỹ mờ tơnguh pràn bơcri priă bàr đah in.