Ală ngai do, oh Vũ Trần Tiến Đạt, kơnòm bơsram ơdŭ 5 Hìu bơsram kấp dùl Nguyễn Thị Định, sàh Ia R’vê, bal mờ mpồl bơyô coh plai tàm tiah ù gời tềng đăp mpồng hìu bơsram dê. Đah đăp, Hìu bơsram ơm sa bĭc tơn 2 kấp sàh Ia R’vê gam rơ hời lơh sir ală bơnah phan dŭt ndơl bơh tiah ơm kis ơm sa bĭc tơn, hìu tàp pràn să jan, hìu sền sră...

Đạt hưh hơh ngan tài nam bơsram 2026–2027 mờr tus, oh bal mờ ală bơyô geh bơsram sră, ơm kis tàm hìu bơsram pa: “Cau pơgru mờ mè bèp oh đơs là bơh nam bơsram tus oh rơ̆p mut bơsram tàm Hìu bơsram ơm sa bĭc tơn 2 kấp sàh Ia R’vê. Oh gơlơh chờ hờp ngan geh mut bơsram tam hơ̆. Tàm do, ală cau pơgru rơ̆p sền gròi bol oh bơh sa sào, bĭc, ơm rlô mờ geh bal tiah tàp pràn să jan. Lồi poh oh hơ̆ sồng rê còp hìu. Oh hơ là rơ̆p bơsram tơryang tơryồng. Kơ̆p kờñ oh dê là gơ gơs cau chài coh plai”.

Ai oh Nông Thị Thùy, kơnòm bơsram ơdŭ 7, Hìu bơsram kấp bàr Trần Hưng Đạo, sàh Ia Lốp pà gĭt, Hìu bơsram ơm sa bĭc tơn 2 kấp sàh Ia Lốp geh bơt jat tàm ală bơta bơh Hìu bơsram kấp dùl Nguyễn Trãi mờ Hìu bơsram kấp bàr Trần Hưng Đạo dê. Den tàng, nam bơsram tus oh rơ̆p bơsram sră, ơm kis tàm do tơn. Tềng đăp ală bơta geh bơsram tàm hìu bơsram pa dờng niam, tơl làm ală phan bơna, mờ tiah ơm kis sàng goh, oh pà gĭt: “Oh chờ hờp ngan tài bơh geh mut bơsram tàm hìu bơsram ơm sa bĭc tơn tài bơh hìu oh dê ngài mờ hìu bơsram tus 15 kơi sồ. Tàm hìu bơsram geh gơ̆p bơyô, geh tiah ơm is cau ùr dờng niam. Oh rơ̆p rcang is tàm rài kis, bơsram is. Kơ̆p kờñ bơh oh dê là gơ gơs ùr pơgru. Oh rơ̆p lơh ngan bơsram sră jak ngan nàng lơh geh bơta kơ̆p kờñ, tơnơ̆ do wơl rê wơl tiah nhàr lơgar bơto jơnau bơsram ai ală oh dềt tàm tiah do in”.

Càr Dăk Lăk geh 4 sàh tiah nhàr lơgar geh Ea Bung, Ia R’vê, Ia Lốp mờ Buôn Đôn. Ală sàh ndrờm geh bă ù ơnàng, làng bol ờ hoan geh, uă thôn, ƀòn ngài mờ anih tờm sàh dê gĭt nđờ jơ̆t kơi sồ. Bi Vi Thị Thiều, ơm tàm thôn Làng Thanh niên lập nghiệp, sàh Ia Lốp pà gĭt: Hìu bơnhă geh 2 nă kòn gam bơsram ơdŭ 8 mờ ơdŭ 6. Hìu ơm ngài mờ hìu bơsram mờr 20 kơi sồ den tàng broă jun rò ală oh kòn lòt bơsram bòl glar ngan. Broă ală kòn geh ơm kis tơn tàm hìu bơsram neh dong hìu bơnhă iang nùs rlau: “Tŭ sau geh bơsram sră, ơm kis tàm dùl tiah dờng ơnàng, tơl làm phan bơna mờ tiah sa sào, tiah ơm rlô bĭc tơl làm den añ iang nùs ngan. Do rơ̆p là tiah ơm dong sau in bơtàu tơnguh tơl làm bơh bơta gĭt wă tus bơta tào dờng să jan dê. Là mè kơnòm bơsram den añ chờ hờp ngan tài bơh ờ duh pal kơlôi rcang jun rò oh kòn pah ngai bè lài do tai, mờ kung ờ duh pal kơlôi rcang sền gàr ală sau tai. Lồi poh sau rê nhơl mờ còp hìu bơnhă”.

Tơngai bơh nam 2025–2027, càr Dăk Lăk lơh 4 nơm hìu bơsram ơm sa bĭc tơn 2 kấp tàm ală sàh tiah nhàr lơgar mờ tiah kal ke. Tàm hơ̆, ală hìu bơsram tàm Ia R’vê, Ia Lốp mờ Buôn Đôn rơ̆p sơnđờm ai ngui tàm nam bơsram 2026–2027, wă pơgăp 3 rơbô 100 nă kơnòm bơsram bơh ơdŭ 1 tus ơdŭ 9, mờ pơgăp 2 bơnah 3 kơnòm bơsram sră, ơm sa bĭc tơn tàm hìu bơsram.

Ồng Hồ Sĩ Cát, Lam bồ Hìu bơsram ơm sa bĭc tơn 2 kấp Ia R’vê (sàh Ia R’vê), pà gĭt, hìu bơsram neh lơh sir broă sac rơwah kơnòm bơsram 910 nă kơnòm bơsram bơh 3 hìu bơsram: Hìu bơsram kấp dùl, kấp 2, Chu Văn An, Hìu bơsram kấp bàr Nguyễn Thị Định mờ Hìu bơsram kấp dùl Nguyễn Đình Chiểu. Mờ hìu bơsram kung pồ geh tơl mpồl cau pơgru, cau lơh broă cơldŭ lơh broă, atbồ kơnòm bơsram mờ hìu ƀềp sào sa, crăp rcang wă kơnòm bơsram tàm nam bơsram pa 2026 – 2027. “Tŭ mờ ală kơnòm bơsram mut tàm hìu bơsram rao den broă atbồ kơnòm bơsram bơh drim tus trồ mang ờ duh pal kơlôi sơnơng tai, iang nùs lòt lơh broă tàm sre mìr. Mè bèp kơnòm bơsram ờ duh pal kơlôi sơnơng rcang klo ngai, mho rò oh kòn, ai oh kòn in sào sa tai. Jơh ală kơnòm bơsram tàm hìu bơsram ơm să bĭc tơn ndrờm geh dờp lèng ală broă lơh dong kờl bơh priă sào sa , ào mpha, sră măi, sră cih, sră kham pràn kơl dang să jan ờ sa priă bơh Dà lơgar dê dong kờl”.

 Ală hìu bơsram tiah nhàr lơgar brê bơnơm dờng ơning ơnàng Tây Nguyên ờ mìng pờ geh tŭ tơngai niam bơsram sră rlau lơm mờ gam lơh geh tai bơta kơ̆p kờñ, dong kơnòm dềt tiah nhàr lơgar bơtàu tơnguh tơl làm, nàng tơnơ̆ do rê wơl pơgồp bơnah bơt bơtàu ƀòn lơgar tờm tiah nhàr lơgar bơh Dà lơgar dê.