Tàm pơrjum cri bơyai mờ ơruh pơnu nam 2026 pa do, ồng Phạm Anh Tuấn, Chủ tịch Anh duh broă Làng bol càr Gia Lai ai nùs nhơm sền gròi ngan tus mờ ală jơnau dan bơh mùl màl bè mŭt lơh broă, tam gơl pa bơceh lơh mờ ai broă lơh. Ơruh pơnu dan hòi jà cau lơh broă măi mok yal tơngit, ai geh broă lơh tơn tàm tiah hơ̆, dong kờl mŭt lơh broă, bơtàu tơnguh lòt nhơl mờ tam gơl sồ tàm broă lơh sa suơn sre. Pal kah ngan, lŏ Trần Thị Bé, Kwang Lam bồ Công ty TNHH MTV Trần Lâm Gia Phát geh jơnau dan ngui ală hìu lơh broă sră nggal gơtìp jơnkah tơnơ̆ mờ rơndăp tơmŭt bal nàng lơh anih ròng jơnau mŭt lơh broă tam gơl pa bơceh lơh in. 

Lŏ Trần Thị Bé, Kwang Lam bồ Công ty TNHH MTV Trần Lâm Gia Phát đơs: “Dan mờ càr lơh broă lơh anih ròng jơnau mŭt lơh broă tam gơl pa. Tŭ do, tàm ală hìu lơh broă sră pơ-àr gơnoar atbồ lơgar tàm ală tiah tàm gùl gam gơtìp jơnkah uă ngan, tàm tŭ geh ală mpồl lơh broă kờñ pờ geh anih ròng pal ơpah ù tiah. Añ kờñ ngan geh tus tàm ală anih bè hơ̆ nàng bol añ geh dơ̆ ờ geh ală anih ròng, mờ bơta kwơ màng geh ală kes priă dong kờl tơnơ̆ mờ mŭt lơh broă nàng gơtùi dong kờl ai ờ uă bơyô gam kơnòm să in sơrlèt mờ tơngai kal ke”.

Bơh jơnau dan do, ồng Phạm Anh Tuấn, Chủ tịc Anih duh broă Làng bol đơs nền gơnoar atbồ rơ̆p ai geh tiah niam nàng ơruh pơnu in yal mờ lơh jăt bồ tơngoh kơlôi sơnơng. "Añ tàm do tŭ lơi kung rơcang lài geh tiah niam nàng ală bơyô in yal bè bồ tơngoh kơlôi sơnơng kờñ lơh. Bol añ rơ̆p hòi di ală mpồl lơh sa kă bro lơi kờñ. Mpồl lơh sa kă bro hơ̆ sền niam, den dong kờl ală bơyô lơh mơ. Bol añ kung rơ̆p geh ală broă dong kờl ai ală mpồl lơh sa kă bro hơ̆ in nàng dong kờl ală bơyô sơl. Tŭ do mpồl lơh sa kă bro lơi kung ai bơta pràn nàng tam gơl pa bơceh lơh sơl. Ală bơyô pal khin lơh mờ nùs nhơm drơng broă, lơh broă, geh kơnòl”.

Nùs nhơm gơnoar atbồ lòt bal kung geh ai tơng gŏ bơh jơnau “Làng bol, mpồl lơh sa kă bro lùp - Gơnoar atbồ càr Gia Lai hơ”, sơn đờm bơh nhai 8 nam 2026, bơh Cơldŭ lơh broă Anih duh broă Làng bol càr pơgồp bal mờ Anih pờ tơlik jơnau đơs mờ sơn-io rùp càr Gia Lai dê lơh. Jat hơ̆, làng bol, mpồl lơh sa kă bro gơtùi pơyua jơnau lùp bè jơnau lơh nền, gùng dà, broă lơh anih bơcri priă mờ bơta gơ kòl bè sră nggal gơnoar atbồ bơh ală gah dờp càr dê. Nhai 8, tơngu me tơrgùm tàm ù tiah, tơm wơl, ai ù lơh rơndap broă mờ bơtàu tơnguh lơh sa nă să is. Ală nhai pơn jat tai rơp rề ơnàng gơs tam gơl wơl sră pơ àr gơnoar atbồ, tam gơl sồ, lơh sa suơn sre ngui măi mok pa, AI, gàr lơngăp lơngai rài kis mpồl bơtiàn, lơh sơnơm mờ bơto bơsram. Ồng Lê Dũng Linh, Kwang Lam bồ Anih tờm drơng broă sră pơ àr gơnoar atbồ càr Gia Lai pà git: “Ală jơnau lùp geh tơl bơta dờp, hơ̆ là ờ gơwèt broă gơrềng tus yal yă, yal khài den jơh ală kal ke, bơta gơ kòl làng bol, mpồl lơh sa kă bro dê ndrờm geh dờp lơm. Làng bol, mpồl lơh sa kă bro pơyoa tus, bol hi rơp dờp, pơyua tus anih lơh broă geh gơnoar in hơ. Anih lơh broă hơ̆ pal bơsong tơn”.

Tàm Gia Lai, iat làng bol ờ mìng gơ-ơm wơl tàm tìp mat tàm boh bơr, mờ pal geh ai tơnggŏ mờ ală broă lơh mùl màl. Bơh tă bơsong dùl sră nggal, bơsong dùl bơta gơkòl tus jat sền dùl jơnau đơs, jơnau dan tus gùng tus dà, hơ̆ là broă nàng gơnoar atbồ ơm rềp làng bol, lòt bal mờ làng bol bal mờ mpồl lơh sa kă bro. Tŭ jơnau đơs bơh mùl màl geh hơ wơl mờ broă lơh den bơta rềp bal đah gơnoar atbồ mờ làng bol Gia Lai rơp ngai sơlơ geh đềt mềr rơlao, lơh gơlik tai bơta pin dờn mờ gơn kơnờm ai bơtàu tơnguh in.