7 nhai do, sơñio sồ lơh sa mờ măi mok bơh càr Dăk Lăk dê gơguh mờr 14% pơndrờm dùl tŭ bal mờ nam lài; tàm hơ̆ lơh sa mờ măi mok lơh gơlik phan, mòn lơh phan gơguh mờr 15%, lơh sa mờ tam pà ồs đèng gơguh rlau 12%. Nàng pơgồp bơnah lơh geh jơnau kờñ gơguh tai lơh sa bơh 10% rlau hơđang, càr Dăk Lăk ai jơnau kờñ sơñio khà lơh sa mờ măi mok 5 nhai lồi nam gơguh mờr 20%.

Ồng Đỗ Hữu Huy, Chủ tịch Anih duh broă Làng bol càr Dăk Lăk pà gĭt, càr rơ̆p tơrgùm gàr niam lơh sa bơh ală hìu măi gam geh, tă bơsong sră pơ àr nàng ai ală rơndăp broă lơh pa in mut lơh broă tàm nam do, mơkung lơh pràn lơh gơlik jrô mờ gơ hòi gơ jà lơh sa mờ măi mok ngui măi pa, lơh sa mờ măi mok dong kờl pơgồp bal mờ logistics. “Bol añ lơh mhar ală tŭ tơngai mut lơh ai ală rơndăp broă lơh lơh sa mờ măi mok pa in mut lơh broă mơ tàm nam 2026. Tàm ntrờn pràn kơl dang tus lơh gơlik jrô, tơnguh uă cồng nha bơta kwơ gơguh tai kung bè bơt bơtàu măt kă bro bè phan lơh geh bơh broă lơh sa suơn sre; Gơ hòi gơ jà, sac rơwah ală rơndăp broă lơh măi mok pa, lơh sa mờ măi mok dong kờl, den lơh sa tàm pơdar pơgồp bal mờ ù tiah bơh logistics dê. Bol añ rơ̆p pơn jat tai gàr niam lơngăp lơngai năng lượng, pơgồp bal niam nàng bơsong bơta pràn lơh broă ală rơndăp broă lơh năng lượng lơh gơlik wơl bơh càr dê, mờ rơ̆p hơ sền sơwì dờp lơh jat gùng dà lơh nền bơcri priă lơh gờñ ngan rlau jơh ai ală rơndăp broă lơh in ờ gơtìp kòl yan lơi tus mờ ù brê”.

Bè năng lượng, càr Dăk Lăk neh dờp gùng dà lơh nền bơcri priă lơh 19 rơndăp broă lơh mờ kờp jơh bơta pràn rlau 1 rơbô 217 MW; 4 hìu măi đèng càl, kờp jơh bơta pràn 200 MW neh ai lơh broă. Càr Dăk Lăk dan mờ Bộ Lơh sa mờ măi mok mờ Kă bro phan dong kờl tơnguh bơta pràn năng lượng lơh gơlik wơl tàm Rơndăp ù tiah đèng VIII tam gơl niam, bơtàu tơnguh đèng càl tàm dà lềng mờ lơh mhar bơcri priă lơh  gùng che pờ ồs đèng.

Ồng Trương Thanh Hoài, Thứ trưởng Bộ Lơh sa mờ măi mok mờ Kă bro phan đơs càr Dăk Lăk geh bơta pràn dờng bè năng lượng, phan lơh geh bơh broă lơh sa suơn sre mơya kờñ pal geh broă lơh dờng màng bơtàu tơnguh pa, lơh bal ù tiah đah mat tơngai Mut mờ đah mat tơngai Lik; tàm hơ̆ đah mat tơngai Mut bơtàu tơnguh lơh sa mờ măi mok lơh gơlik phan, ai tiah đah mat tơngai Lik digơlan tơrgùm lơh sa mờ măi mok lơh gơlik phan mờ tăc bro năng lượng.“Tiah đah mat tơngai Lik ngan là bơnah tăc bro ồs đèng uă ngan, mơya đah mat tơngai Mut den lơh gơlik năng lượng uă ngan. Dilah kờp sền wơl lơh bè lơi tàm ntrờn ală anih lơh sa mờ măi mok kơn jơ̆ tàm tiah đah mat tơngai Lik nàng tăc bro ƀà dùl bơnah năng lượng lơh gơlik ồs đèng tàm tiah đah mat tơngai Mut. Bơta do pal geh dùl broă lơh kwơ màng dùl ù tiah bơtàu tơnguh pa, añ kơlôi là càr pal geh bơta bơto pơlam gùng dà wơl tàm tơngai tus nam 2030 mờ sền sơnơng bơh nam 2035 -2045.”

Thứ trưởng kung sồr càr Dăk Lăk khin cha lơh ƀuơn ngan sră pơ àr bơcri priă lơh, ngan là ală rơndăp broă lơh ồs đèng; mơkung lơh mhar ală broă lơh pờ đèng tờm. Bộ Lơh sa mờ măi mok mờ Kă bro phan rơ̆p tă pơgồp jơnau đơs mờ Chính phủ broă lơh mpồl bơtiàn lơh bal, bơcri priă lơh jat broă lơh BOT gơwèt mờ gùng che pờ ồs đèng nàng tơrgùm tai bơta pràn bơdìh mờ kes priă dê.