Dăk Lăk tŭ do geh rlau 1 rơbô 200 broă lơh bơt bơtàu rbòng dà, geh 676 tơnau dà, 286 tơnau dơng dà tih, 244 trạm ƀồm dà mờ 2 bơtơ̆t àr. Tềng đăp tơngai kàl mìu dà tih dà lìu uă, Anih duh broă Làng bol càr sồr ală mpồl lơh broă, ală tiah lòt sền, sền sơ wì bơta geh ngan bơh tơl broă lơh bơt bơtàu, ngan là ală tơnau dơng dà, tơnau dà, bơtơ̆t dơng dà, broă lơh ờ diơng halà geh pơhìn roh bơta lơngăp lơngai nàng di tŭ gĭt gŏ, bơsong ală bơta ờ niam.

Mờ ală tiah kung pal kờp sền broă lơh mut lơh tơnau dơng dà, hìu măi đèng dà; lòt sền ală bơtơ̆t nàng yal tơngĭt lài, tàm yal tơngĭt jơnau mờ gùng dà broă lơh ntrờn làng bol tàm bơta digơlan gơlik geh mìu dờng, dà kŏ dà cò halà bơta aniai broă lơh bơt bơtàu dê. Gơwèt mờ ală tơnau dơng dà dờng, mpồl geh tàm jàu pal gàr niam broă ơm gak, jat sền bơta gơlik geh mìu dờng dà tih dà lìu, khà dà tih mờ rcang lài mut lơh, yal tơngĭt lài di tŭ.