Jat jơnau yal tơrgùm wơl jơnau đơs mpồl lơh sa kă bro dê, kòl yan tàm 4 gah (ù tiah, tiah ơm kis, phan kwơ tàm ù mờ phan bơt bơtàu) tơrgùm 5 mpồl jơnau gơbàn tờm geh bơta tàm pơn jat bal. Hơ̆ là bơta lơyài mờ tàm gơlin lơh nền giă ù; bơta tam cah is đah kơnòl priă jền adat boh lam mờ bơta pràn dờp lèng gơnoar ngui ù; Hoàc huơr adat boh lam gơwèt mờ ală jơnau lơh nền sră pơ àr gơnoar atbồ neh ai lơh jat; Ờ tơl broă jàu lơh nền khà tàm sră pơ àr tiah ơm kis mờ rơndap ù tiah; Bồ tơngoh kơlôi sơnơng atbồ dà tuh tơlik bơdìh jat gùng dà sang tĕ ala tài tàm pơdar.

Đơs pơndŭt pơrjum, ồng Hồ Quốc Dũng- Phó Thủ tướng sồr ală Bộ, gah hơ song dơ pă, đơs ngan ală jơnau đơs bơh mpồl lơh sa kă bro dê, tam pà loh kơnòl bơh Dà lơgar mờ ƀòn lơgar. Đơs sùm Chính phủ tŭ do tơrgùm tàm bơt bơtàu kơrnoat boh lam mờ tă bơsong kal ke bơh tam pà kấp, tam pà gơnoar pràn kơl dang ai ƀòn lơgar in, Phó Thủ tướng tơngkah ală bơta kòl yan, kal ke, ală jơnau sồr adat boh lam gam tàm rơndăp rơndồl, ờ niam tàm gah ù tiah mờ tiah ơm kis pal geh sền sơ wì tàm broă lơh tam gơl pa adat ù tiah, adat tiah ơm kis, adat priă dia phan kwơ tàm ù mờ ală sră nggal bơto pơlam lơh jat nàng lơh geh ală bơta ƀuơn ngan rlau jơh ai mpồl lơh sa kă bro in bơtàu tơnguh, tă pơgồp tàm bơta gơguh tai bal bơh dà lơgar dê.