Do là dơ̆ lòt còp sơn rờp bơh Đơng lam kâp dờng ngan rlau jơh lơgar Việt Nam dê tus lơgar New Zealand tơnơ̆ tŭ bàr lơgar ngan ngồn tơnguh gơnoar broă bơta git gơp 2 gah gơs Lơgar lơh broă bal jŏ jòng tơl làm tàm nam 2025 di tơnkah 50 nam ngai tơng gơs bơta git gơp, tàm tŭ tơngai bơta git gơp 2 lơgar gam bơtàu tơnguh niam ngan, kơnhăp kơ̆ jat tàm bơta pin dờn chính trị uă mờ bơta pin dờn kuơ màng đah 2 lơgar ngai sơlơ geh gàr kơ̆.

Dơ̆ lòt còp ai gŏ gùng dà broă lơh ờ tam gơl bơh Việt Nam dê sền dờng màng bơta git gơp mờ lơgar New Zealand - dùl lơgar lơh broă bal rềp mềr, bềng bơta pràn tàm tiah đah jum Thái Bình Dương, mờ kung là tŭ tơngai kuơmàng lam bơta git gơp Lơh broă bal jŏ jòng tơl làm đah Việt Nam mờ New Zealand bơtàu tơnguh pràn kơldang, ngan ngồn mờ geh cồng nha rlau tai tàm tŭ tơngai pa. Kờp dŭ lài tàm 2 ngai, ồng Tô Lâm - Tổng Bí thư, Chủ tịch lơgar rơp pơrjum bơyai mờ mò Cindy Kiro, Kwang atbồ lơgar New Zealand; Pơrjum bơyai mờ ồng Christopher Louxon, Thủ tướng lơgar New Zealand; Tìp mat kâp dờng mờ Chủ tịch Quốc hội New Zealand; Tus bal mờ đơs tàm Anih cribơyai bơto bơtê đại học mờ bơto bơtê broă lơh Việt Nam - New Zealand; Tìp mat kwang bàng, cau lơh broă Anih lơh broă ala mat mờ mpồl bơtiàn cau Việt Nam tàm New Zealand.